Axel fór upp um 13 sæti á lokahringnum og náði sínum besta árangri í ár

Axel Bóasson, atvinnukylfingur úr Keili, endaði í 2. sæti á Ahus KGK Pro/Am mótinu í Svíþjóð. Þetta er besti árangur hans á Nordic Golf mótaröðinni í ár.

Axel lék manna best á lokahringnum í dag, eða á fimm höggum undir pari. Hann fékk sex fugla á hringnum og tapaði aðeins einu höggi.

Hann fór upp um 13 sæti, úr því fimmtánda í 2. sætið sem hann deildi með Dananum Nicolai Kristensen. Þeir voru báðir á samtals þremur höggum undir pari, fimm höggum á eftir sigurvegaranum Jesper Kennegård frá Svíþjóð.

Fyrir mótið var Axel í 29. sæti á stigalista Nordic Tour mótaraðarinnar. Hann fer væntanlega upp um nokkur sæti eftir árangur helgarinnar.

Haraldur Franklín Magnús endaði í 39. sæti á níu samtals höggum yfir pari.

Íslandsmeistarinn Guðmundur Ágúst Kristjánsson komst ekki í gegnum niðurskurðinn. Hann hefur þegar tryggt sér þátttökurétt á Áskorendamótaröðinni á næsta ári.