Gigi Hadid sögð vera að hitta Bachelorette-stjörnu

Ofurfyrirsætan Gigi Hadid hefur sést að undanförnu með Tyler Cameron, sem flestir þekkja úr síðustu seríu The Bachelorette. Tyler lenti í öðru sæti þáttanna, mörgum aðdáendum til mikils ama, enda hafði hann lengi þótt líklegur til þess að sigra hjarta Hönnuh Brown sem valdi tilvonandi eiginmann úr hópi þrjátíu karlmanna í þáttunum.

Allt kom fyrir ekki og Hannah valdi á endanum söngvarann Jed Wyatt og var ákvörðunin umdeild. Fréttir af því að Jed ætti í raun og veru kærustu í heimabæ sínum tóku að spyrjast út. Kærastan sjálf steig loksins fram og greindi frá því að hann hafði sagt henni að hann ætlaði í þættina til þess að koma tónlistarferli sínum á flug og ætti ekki von á því að ná langt í þáttunum.

Sjá einnig: Áhorfendur Bachelorette-þáttanna agndofa yfir lygilegum endalokum

Trúlofun Hönnuh og Jed var því skammlíf en í uppgjörsþætti þáttanna, sem fram fór tveimur mánuðum eftir lokaþáttinn sjálfan, lágu leiðir þeirra Hönnuh og Tyler aftur saman. Þar sagðist hún vera einhleyp ung kona sem bæri enn tilfinningar til hans og bauð honum á stefnumót, sem hann þáði.

Örfáum dögum eftir umrætt stefnumót sást þó til Tyler með ofurfyrirsætunni Gigi Hadid, sem var lengi vel með One Direction-söngvaranum Zayn Malik, og eru þau sögð vera að hittast.

Hannah hefur tjáð sig um meint samband Tyler og ofurfyrirsætunnar og sagði hann eiga fullan rétt á því að gera það sem honum sýnist. Fregnir af sambandi þeirra hafi hins vegar verið ögn ruglandi og hún sé ekki par sátt við hversu fljótur hann var að hitta fyrirsætuna eftir stefnumót þeirra. Það hafi verið sárt að heyra af honum á öðru stefnumóti aðeins tveimur dögum síðar.

„Við eyddum tíma saman, en við ræddum líka að það væri ennþá eitthvað þarna. Og þegar þú ert opinber persóna þá þarftu að sýna hinum aðilanum virðingu. Já, ég hefði viljað að það hefðu liðið fleiri en tveir dagar. En þú veist, það er allt í lagi,“ sagði Hannah um stefnumótin.