Guðbjörg bætti tveggja tíma gamalt Íslandsmet Tiönu

Guðbjörg Jóna Bjarnadóttir bætti Íslandsmetið í 100 metra spretthlaupi á sterku unglingamóti í Þýskalandi í dag.

Fyrr í dag sló Tíöna Ósk Whitworth Íslandsmetið á tímanum 11,57 í undanrásunum en Guðbjörg gerði betur og hljóp úrslitahlaupið á 11,56 sekúndum.

Guðbjörg kom sú fyrsta í mark en Tíana var sekúndubroti á eftir Guðbjörgu. Hún kom önnur í mark á sama tíma og í undanrásunum.

Stelpurnar hafa verið að hlaupa frábærlega úti í Þýskalandi en þær hafa hlaupið fjórum sinnum undir gamla Íslandsmetinu sem var 11,63 sekúndur.

Það met hafði staðið í fimmtán ár en myndband af hlaupinu má sjá hér að neðan.