Engin vandamál hjá Dönum | Öll úrslitin í undankeppninni

Tólf leikir fóru fram í undankeppni EM 2020 í kvöld.

Eftir að hafa gert jafntefli í fyrstu tveimur leikjum sínum í D-riðli unnu Danir öruggan sigur á Georgíumönnum, 5-1.

Kasper Dolberg skoraði tvö mörk fyrir danska liðið og Christian Eriksen (víti), Yusuff Poulsen og Martin Braithwaite sitt markið hver. Danmörk er í 2. sæti D-riðils með fimm stig, fimm stigum á eftir toppliði Írlands sem vann 2-0 sigur á Gíbraltar í Dublin.

Pólland vann 4-0 sigur á Ísrael og er með fullt hús stiga á toppi G-riðils. Í sama riðli vann Austurríki Norður-Makedóníu, 1-4, og Slóvenía kjöldró Lettland, 0-5.

Í A-riðli vann Tékkland 3-0 sigur á Svartfjallalandi og Kósovó vann 2-3 sigur á Búlgaríu. Þetta var fyrsti sigur Kósovó í undankeppni. Sigurmarkið kom í uppbótartíma. Englendingar og Tékkar eru með sex stig í efstu tveimur sætum A-riðils en enska liðið á leik til góða.

Eftir slæmt tap fyrir Úkraínumönnum í síðustu viku ráku Serbar af sér slyðruorðið og unnu Litháa, 4-1, í B-riðli. Úkraína styrkti stöðu sína á toppi riðilsins með 1-0 sigri á Lúxemborg.

Spánverjar unnu 3-0 sigur á Svíum og eru með fullt hús stiga á toppi F-riðils. Í sama riðli unnu Norðmenn Færeyinga, 0-2, og Rúmenar báru sigurorð af Maltverjum, 0-4.

Úrslit kvöldsins:

A-riðill

Tékkland 3-0 Svartfjallaland

Búlgaría 2-3 Kósovó

B-riðill

Serbía 4-1 Litháen

Úkraína 1-0 Lúxemborg

D-riðill

Danmörk 5-1 Georgía

Írland 2-0 Gíbraltar

F-riðill

Spánn 3-0 Svíþjóð

Færeyjar 0-2 Noregur

Malta 0-4 Rúmenía

G-riðill

Pólland 4-0 Ísrael

Norður-Makedónía 1-4 Austurríki

Lettland 0-5 Slóvenía