Í dag kom í ljós að leikarinn Þórir Sæmundsson væri á bak við nafnlausa Twitter-aðganginn @BoringGylfiSig en umræða um aðganginn hefur farið hátt á meðal Íslendinga á samskiptaforritinu. Aðgangurinn, sem var stofnaður í desember 2017, er settur upp undir nafni knattspyrnumannsins Gylfa Þórs Sigurðssonar sem nokkurs konar ádeiluaðgangur og hefur alla tíð verið nafnlaus.
Í dag birti svo sálfræðineminn Karólína Jóhannsdóttir skjáskot af færslu sem @BoringGylfiSig birti í gær þar sem má sjá skjáskot af Instagram. Í neðra horni skjáskotsins mátti sjá prófílmynd þess sem átti umræddan Instagram-aðgang og var ráðgátan um hver væri á bakvið @BoringGylfiSig þar með leyst.
Jæja. Let's go. @BoringGylfiSigpic.twitter.com/Yofqcg5mwc
— karó (@karoxxxx) May 26, 2019
Eigandi Instagram-aðgangsins, og þar með maðurinn á bakvið nafnlausa Twitter-aðganginn, er leikarinn Þórir Sæmundsson en Þórir hafði verið virkur á samskiptamiðlinum til ársins 2016, þegar hann tilkynnti fylgjendum sínum að hann væri hættur á Twitter.
Ég er hættur á twitter.
Sjáumst í raunheimum.
— Bjarni H. Kreutzhage (@ThorirSaem) July 10, 2016
Aðgangurinn stofnaður stuttu eftir brottrekstur úr Þjóðleikhúsinu
Athygli vekur að nafnlausi aðgangurinn var stofnaður stuttu eftir að Þóri var vikið frá störfum í Þjóðleikhúsinu eftir að hafa sent typpamynd af sér til samstarfskonu í leikhúsinu en Vísir fjallaði um málið á sínum tíma.
Sjá einnig: Rekinn úr Þjóðleikhúsinu vegna typpamyndar
Áður hafði leikhúsinu borist nafnlaus ábending um að fimmtán ára stúlka hefði fengið ósiðlegar myndir frá Þóri í skilaboðum á Twitter og birtu margar stúlkur í kjölfarið skjáskot af samskiptum sínum við hann. Eftir að í ljós hefur komið að Þórir er maðurinn á bakvið aðganginn hafa fleiri stúlkur birt skjáskot og sett í samhengi við nafnlaus tíst hans.
Fyrir viku síðan tjáði Þórir sig um nafnleyndina á Twitter og sagðist oft hafa rekist á fólk á förnum vegi sem hann ætti samskipti við á Twitter. Hann hefði gaman af því á sama tíma og honum þætti það erfitt.
Er svona 350 sinnum búin að rekast á fólk sem ég hef talað við á twitter á förnum vegi in real life.
Elska þetta.
Samt stundum erfitt.
Langar stundum að öskra ÉG ER GYLFI SIG!
Sérstaklega framan í Siffa
— Zen Gylfi Sig (@BoringGylfiSig) May 19, 2019
Í dag var ráðgátan leyst og steig Þórir fram sem maðurinn á bakvið @BoringGylfiSig.
Jæja það hlaut að koma að því.
Hæ ég er boring Þórir Sæm
— Zen Gylfi Sig (@BoringGylfiSig) May 26, 2019