Íslenskur fjársvikari og flugstjóri finnst ekki

Erfingjar eldri manns sem lést í febrúar 2017 hafa stefnt 57 ára flugstjóra sem fékk tólf mánaða dóm fyrir að svíkja 42 milljónir út úr gamla manninum. Sá glímdi við Alzheimer.

Fjársvikarinn dæmdi og flugstjórinn virðist búsettur í Þýskalandi samkvæmt upplýsingum erfingjanna en ekki hefur tekist að hafa uppi á heimilisfangi hans þrátt fyrir miklar tilraunir. Fyrir vikið er stefnan á hendur honum birt í Lögbirtingablaðinu en málið verður þingfest í Héraðsdómi Reykjavíkur þann 27. júní.

Flugstjórinn var í sveit hjá gamla manninum þegar hann var ungur en milljónirnar 42 voru millifærðar af reikningum hans í þremur millifærslum. Um var að ræða bróðurpartinn af eignum mannsins. Hann var vistmaður á hjúkrunarheimili á þeim tíma sem millifærslurnar áttu sér stað. Málið komst upp þegar í ljós kom að maðurinn hafði ekki efni á tíma hjá tannlækni.

Framburður flugstjórans fyrir dómi var eilítið á skjön við framburð hans hjá lögreglu. Hjá lögreglu sagði hann að féð væri gjöf frá brotaþola, sem hinn aldni maður bauð að fyrra bragði, en fyrir dómi var það lán vegna fjárhagsvandræða ákærða. Einnig hafi hann sagt hjá lögreglu að upphæð fyrstu millifærslunnar, 25 milljónir, hefði komið frá honum sjálfum en fyrir dómi þá höfðu þeir ákveðið fjárhæðina í sameiningu.

Skellti sér til Flórída

Héraðsdómur og svo Hæstiréttur sakfelldu manninn fyrir fjársvik. Auk tólf mánaða dóms, sem var að mestu skilorðsbundinn, var hann dæmdur til að endurgreiða milljónirnar 42 með vöxtum. Bauðst flugstjórinn, áður en málið færi fyrir dóm, til að greiða upphæðina til baka samkvæmt greiðsluplani gegn því að fallið yrði frá málinu.

Planið hljóðaði upp á innborgun upp á tvær milljónir króna og svo 500 þúsund krónur mánaðarlega yfir sjö ára tímabil. Dánarbú hins látna hafnaði boðinu og sagði enga tryggingu fyrir greiðslunni auk þess sem flugstjóranum væri ekki treystandi.

Það var svo í mars 2017 sem maðurinn var tekinn til gjaldþrotaskipta. Skiptastjóri búsins tók skýrslu af stefnda 24. júlí sama ár. Sagðist hann ekki eiga neinar eignir heldur hafa selt þær allar, farið til Flórida og „haft það gott þar.“

Skiptastjóri tilkynnti um lok skipta á búi stefnda hefðu farið fram 10. júlí 2017 með tilkynningu í Lögbirtingablaði sem birtist 18. janúar 2018. Kom þar fram að engar eignir hefðu fundist í búinu.

Með skráð lögheimili í Þýskalandi

Lögheimili mannsins er skráð í Þýskalandi hjá Þjóðskrá. Þrátt fyrir ítrekaða leit hefur ekki tekist að finna hann þar segir í stefnunni. Engin þjóðskrá mun vera haldin í Þýskalandi samkvæmt upplýsingum frá íslenska sendiráðinu í Berlín, utanríkisráðuneytinu og Þýska sendiráðinu í Reykjavík.

Þá getur Þýsk-Íslenska verslunarráðið ekki aðstoðað við leit sem þessa. Sama máli gegnir um TCM Innheimtuþjónustu, sem m. a. sérhæfir sig í innheimtu krafna erlendis í tengslum við alþjóðlegt móðurfyrirtæki sitt. Þá hafa ekki fengist svör frá flugfélaginu Atlanta um heimilisfang stefnda. Svör frá þýskri lögmannsskrifstofu hafa enn ekki borist.

Í stefnunni segir að flugstjórinn starfi hjá Flugfélaginu Atlanta sem flugstjóri með langan starfsaldur og virðast laun flugmanna félagsins vera með þeim hærri sem þekkist hér á landi. Samkvæmt tekjublöðum Frjálsar verslunar vegna ársins 2017 og 2018 komi einnig fram ábendingar um verulega há launakjör flugstjóra og flugmanna hjá Air Atlanta.

Eftirgrennslan Vísis bendir til þess að flugstjórinn sé ekki virkur á samfélagsmiðlum og þá hefur símanúmeri hans á Íslandi verið lokað.

Reyna á firningartíma gjaldþrota

Erfingjar mannsins eru þrír en um er að ræða vinafólk hins látna sem var barnlaus. Fólk sem hinn látni leit svo á að hefði stutt sig vel í gegnum tíðina og aðstoðað sig við ýmislegt á eldri árum.

Fróðlegt verður að sjá hvernig málinu vindur fram. Samkvæmt breytingum gjaldþrotalögum sem tóku gildi tveimur árum eftir hrun rennur firningarfrestur á hendur gjaldþrota einstaklingi út á tveimur árum. Sá tími er liðinn í tilfelli flugstjórans. Þau lög voru sett meðal annars til að auðvelda fólki að koma sér aftur af stað eftir fall bankanna haustið 2008 með tilheyrandi greiðsluvandamálum fyrir fjölda fólks.

Stefnendur leitast þó við að sýna fram á að maðurinn skuldi kröfuna áfram og um hann eigi að gilda tíu ára firningarfrestur. Til þess þarf þó að sanna að flugstjórinn sé sannarlega borgunarmaður fyrir kröfunni á tíu ára firningartíma. Sé miðað við laun flugmanns hjá Atlanta eigi hann sannarlega að vera borgunarmaður fyrir þeim auk þess sem ítrekað hafi komið fram við meðferð málsins fyrir dómi á sínum tíma að hann ætlaði að endurgreiða peningana.