Myndskeið af árásarmanni birt

Myndskeið hefur verið birt sem sýnir mann sem talinn er hafa sprengt eitt hótelanna í Srí Lanka, fyrir utan Tropical Inn hótelið í Dehiwala rétt áður en sprengingin varð. Fréttastofa Sky news birti myndband af árásarmanninum úr öryggismyndavél við hótelið.

Maðurinn, sem ber nafnið Abdul Lathief Jameel Muhamed, er talinn hafa framið voðaverkið, en hann var stúdent í Bretlandi á árunum 2006-2007.  

Í myndbandinu, sem tekið var upp á öryggismyndavél fyrir utan hótelið, sést Muhamed standa fyrir utan hótelið áður en hann, talinn íklæddur sprengjuvesti, virkjaði sprengjuna.

Myndbandið kom fram eftir að lögreglan í Srí Lanka lagði fram beiðni um að fá upplýsingar um þrjár konur og einn mann sem talin eru hafa átt aðild að árásunum. Lögreglan birti myndir af þeim grunuðu, sem öll virðast vera á þrítugs aldri, en tóku ekki fram hvernig fjórmenningarnir tengdust árásunum.

Mohamed er talinn vera einn þeirra níu sem frömdu árásirnar, sem beint var að kirkjum og hótelum á Srí Lanka, sem bönuðu 253 einstaklingum og særðu meira en 500.

Borin hafa verið kennsl á átta af þeim níu sem frömdu sjálfsvígsárásirnar, en Ruwan Wijewardene, varnarmálaráðherra landsins, sagði þau öll hafa verið vel menntuð og af vel efnuðu fólki komin.

Kona, sem talin er hafa verið eiginkona eins sjálfsvígssprengjumannanna, sprengdi sig í loft upp á heimili tengdaföður síns, sem hefur nú verið tekinn í varðhald, samkvæmt fyrrverandi sjóhersforingja Srí Lanka.

Tveir sona hans eru sagðir hafa verið sprengjumenn.

Mohamad, sem var fæddur árið 1982, er talinn hafa stundað nám í suðaustur Englandi á árunum 2006-2007. Hann kláraði síðar nám í Ástralíu áður en hann flutti aftur til Srí Lanka.

Lögreglan hefur að svo stöddu handtekið 60 manns í tengslum við málið, sem allir eru ríkisborgarar Srí Lanka og 32 þeirra eru enn í varðhaldi.

Yfirvöld hafa sagt hópinn National Thowfeek Jamaath hópinn bera ábyrgð á árásunum en á þriðjudag tóku samtök sem kenna sig við íslamskt ríki ábyrgð á voðaverkunum rétt áður en þau birtu myndskeið af leiðtoga National Thowfeek Jamaath hópsins sverja Abu Bakr al Baghdadi, leiðtoga samtakanna sem kenna sig við íslamskt ríki, hollustu sína.

Ranil Wickremesinghe, forsætisráðherra Srí Lanka, hefur játað að leyniþjónusta landsins hafi búið yfir upplýsingum sem hefðu getað komið í veg fyrir árásirnar hefðu þær verið nýttar á réttan hátt. Hann sagði upplýsingaflæði ekki hafa verið nógu gott.

Lakshman Kiriella, þingforseti Srí Lanka, sagði hátt setta leyniþjónustumenn hafa leynt upplýsingunum viljandi og að upplýsingarnar hafi verið til staðar, en háttsettir leyniþjónustumenn hafi ekki gert viðeigandi ráðstafanir. 

„Einhver stjórnar þessum háttsettu leyniþjónustumönnum. Varnarmálaráðið er að taka þátt í stjórnmálum. Þetta verður að rannsaka.“

Uppfært kl. 17:15

Í upphaflegri útgáfu fréttarinnar kom fram að tala látinna væri 359 en nýjar tölur hafa síðan komið fram og er tala látinna nú 253.