FH-ingurinn Ásbjörn Friðriksson er kominn með níu fingur á markakóngstitilinn í Olís deild karla í handbolta en hann hefur átta marka forystu fyrir lokaumferðina.
Ásbjörn Friðriksson hefur skorað 142 mörk í 20 leikjum í deildinni í vetur eða 7,1 mark að meðaltali í leik. Ásbjörn skoraði fimm mörk í öruggum sigri FH-liðsins í gærkvöldi.
Það vekur hins vegar athygli að tveir leikmenn nýliða KA eru í næstu tveimur sætum en það eru skytturnar Tarik Kasumovic og Áki Egilsnes. Tarik er með 134 mörk en Áki er 17 mörkum á eftir Ásbirni og níu mörkum á eftir liðsfélaga sínum.
Tarik Kasumovic er sá leikmaður deildarinnar sem hefur skorað flest mörk utan af velli. Hann nefnilega ekki tekið víti og öll 134 mörkin hans eru utan af velli. Ásbjörn hefur skorað 52 mörk úr vítum og 90 mörk utan af velli. Áki Egilsnes er með 19 mörk úr vítum og 106 mörk utan af velli.
Alls hafa ellefu leikmenn í deildinni skorað meira en hundrað mörk og það gæti fjölgað í þeim hópi í lokaumferðinni. Af þessum ellefu eru sex leikmenn með meira en hundrað mörk utan af velli en það eru Tarik Kasumovic, Þorsteinn Gauti Hjálmarsson, Egill Magnússon, Áki Egilsnes, Elvar Örn Jónsson og Elvar Ásgeirsson.
Haukar eru deildarmeistarar en enginn leikmaður liðsins er meðal fjórtán markahæstu leikmanna deildarinnar. Atli Már Báruson er í 15. sæti með 94 mörk og Heimir Óli Heimisson er tveimur mörkum á eftir í 16. sætinu
Akureyringurinn Ihor Kopyshynskyi er markhæsti hornamaður deildarinnar og Heimir Óli er markahæsti línumaðurinn.
Markahæstu leikmenn Olís deildar karla 2018-19:
(Tölur frá HB Statz á heimasíðu HSÍ)
142 - Ásbjörn Friðriksson, FH
134 - Tarik Kasumovic, KA
125 - Áki Egilsnes, KA
118 - Þorsteinn Gauti Hjálmarsson, Fram
115 - Elvar Örn Jónsson, Selfoss
110 - Egill Magnússon, Stjörnunni
109 - Aron Dagur Pálsson, Stjörnunni
108 - Magnús Óli Magnússon, Val
103 - Anton Rúnarsson, Val
101 - Elvar Ásgeirsson, Aftureldingu
101 - Ihor Kopyshynskyi, Akureyri
- Næstir inn á hundrað marka listann eru ÍR-ingarnir Björgvin Þór Hólmgeirsson og Sturla Ásgeirsson sem báðir hafa skorað 98 mörk.
Nýliðar KA eiga tvo af þremur markahæstu mönnum Olís-deildarinnar
