Formaður VR um Ölmu: „Fyrsta skrefið í að reyna frysta eða koma í veg fyrir frekari hækkanir“

Formaður VR segir það ánægjulegt að komið sé á markað leigufélag sem tryggi framfærslu- og búsetuöryggi leigutaka. Hann segir þó leiguverð óásættanlegt. Nýtt leigufélag gefur leigjendum kost á öruggri leigu til allt að sjö ára á föstu leiguverði sem einungis er tengt vísitölu neysluverðs.

Í febrúar gaf stéttarfélagið VR stjórnendum Kviku banka fjögurra daga frest til þess að draga til baka hækkun á leigu á húsnæði hjá leigufélaginu en Kviku banki er eigandi Almenna leigufélagsins sem hafði þá sent leigjendum sínum bréf þar sem tilkynnt var um hækkun leiguverðs með fjögurra daga fyrirvara. Að öðrum kosti ætlaði stéttarfélagið að taka 4,2 milljarða úr eignastýringu hjá Kviku.

Sjá einnig:Hóta því að taka 4,2 milljarða úr eignastýringu hjá Kviku 



Eftir fundi á milli formanns VR og framkvæmdastjóra Almenna leigufélagsins var ákveðið að hætta við að hækka leiguverðið.

Almenna leigufélagið kynnti nýjan kost í dag þar sem viðskiptavinum er gefinn kostur á leigu til allt að sjö ára með föstu leiguverði og sagði María Björk Einarsdóttir, framkvæmdastjóri Almenna leigufélagsins í þættinum í Bítið á Bylgjunni í morgun að hækkun yrði einungis er tengd vísitölu neysluverðs.

„Ég held allavega að þetta muni hafa jákvæð áhrif til lengri tíma. Við erum að setja ákveðið fordæmi og í raun að gera leigumarkaðinn á Íslandi faglegri og meira í átt við það sem við sjáum erlendis, bara til dæmis í Evrópu og Norðurlöndunum þar sem að leiga er í raun langtíma valkostur við það að kaupa og reka sína eigin fasteign,“ sagði María í þættinum Í bítið á Bylgjunni í morgun.

Fréttastofan skoðaði framboð húsnæðis á heimasíðu Ölmu hjá Almenna leigufélaginu nú fyrir hádegi og kom þar í ljós að tæplega 35 fermetra stúdíóíbúð í miðbænum leigist á 180 þúsund krónur, og tæplega 66 fermetra íbúð, sömuleiðis í miðbænum, leigist á 265 þúsund krónur.

Ragnar Þór Ingólfsson, formaður VR segir það ánægjuefni að komið sé leigufélag sem tryggi framfærslu- og búsetuöryggi en hefur þetta að segja um leiguverð félagsins.

„Leiguverðið sem slíkt er ekki ásættanlegt, langt frá því en þetta er allavega þó fyrsta skrefið í að reyna frysta eða koma í veg fyrir frekari hækkanir sem að er markmið útaf fyrir sig og okkur tókst að vinna þetta með Almenna leigufélaginu, að  komast að samkomulagi um frystingu á hækkun og sömuleiðis að fá lengri leigusamning sem er virkilega ánægjulegt,“ segir Ragnar.

Ragnar segir þó margar ástæður fyrir að leigu verðið sé eins og það er, meðal annars vegna vaxtarstigs og vegna þess að leigufélög eigi erfitt með að fjármagna sig á hagkvæmum kjörum. Hann segir að Bjarg leigufélag sem byggir íbúðir í Grafarvogi og VR á hlut í muni leigja íbúðir á lægra verði.

„Já, já. ég á von á því að leiguverðið verði lægra, bæði lægra almennt og vegna þess að við erum með ákveðin mörk hvað leiga má vera há í samræmi við tekjur viðkomandi, þannig að ég á von á að leiga verði lægri,“ segir Ragnar.