Sport

Heimsmeistarinn féll í fyrsta sinn á tímabilinu

Óskar Ófeigur Jónsson skrifar
James Wade var flottur á móti heimsmeistaranum.
James Wade var flottur á móti heimsmeistaranum. Getty/ Dean Mouhtaropoulos
Heimsmeistarinn Michael van Gerwen tapaði í fjórðu umferð úrvalsdeildarinnar í pílu í gærkvöldi en þetta var fyrsta tap hans á tímabilinu.

James Wade endaði sigurgöngu Hollendingsins snjalla með því að vinna viðureign þeirra 7-3. Van Gerwen var 3-2 yfir en þá fór James Wade á mikið flug og tryggði sér sigur með því að vinna fimm sett í röð.

„Margir gefast upp á móti Michael að óþörfu en ég hélt út og er mjög ánægður með sigurinn,“ sagði James Wade eftir sigurinn. Hann komst upp í annað sætið með þessum sigri og er nú bara einu stigi á eftir Michael van Gerwen.





Michael van Gerwen hafði unnið þrjá fyrstu leiki sína í úrvalsdeildinni en keppt er með deildafyrirkomulagi með 2 stig fyrir sigur og 1 stig fyrir jafntefli. Úrslitin ráðast síðan í fjögurra manna úrslitakeppni en Michael van Gerwen hefur unnið úrvalsdeildina undanfarin þrjú ár og fjórum sinnum alls.

Rob Cross, heimsmeistarinn frá 2018, hafði tapað illa á móti Michael van Gerwen í vikunni á undan en Cross kom öflugur til baka og vann sannfærandi 7-1 sigur á Daryl Gurney í gær.

Mensur Suljovic og Michael Smith unnu síðan báðir fyrstu sigra sína í úrvalsdeildinni á þessu tímabili. Suljovic vann Peter Wright 7-4 og Raymond van Barneveld réð ekki við Smith.

Michael Smith varð í öðru sæti á HM um áramótin en var að spila á öðrum fætinum eftir að hafa þurft að láta fjarlægja ígerð úr mjöðm á dögunum. Smith lét það ekki stoppa sig og komst fyrir vikið upp úr neðsta sætinu.

Luke Humphries og Gerwyn Price gerðu svo 6-6 jafntefli í síðustu viðureigninni og fá því eitt stig hvor.

Hér fyrir neðan má sjá skemmtilegt yfirlit yfir fjórðu umferðina í gærkvöldi.





Úrslitin í 4. umferðinni:

Luke Humphries 6-6 Gerwyn Price

Daryl Gurney 1-7 Rob Cross

Mensur Suljovic 7-4 Peter Wright

Michael van Gerwen 3-7 James Wade

Michael Smith 7-4 Raymond van Barneveld

Staðan eftir 4. umferðina:

1. Michael van Gerwen 6 stig

2. James Wade 5 stig

3. Rob Cross 5 stig

4. Gerwyn Price 5 stig

5. Mensur Suljović 4 stig

6. Peter Wright 4 stig

7. Daryl Gurney 4 stig

8. Michael Smith 3 stig

9. Raymond van Barneveld 2 stig

Aðrar íþróttir

Mest lesið


Fleiri fréttir

Sjá meira


×

Mest lesið