Ekki einsdæmi að félög deili sjóðum í verkfallsaðgerðum

„Það eru til fordæmi fyrir því að stéttarfélög deili með sér kostnaði vegna verkfalla. Síðasta dæmi um slíkt eru verkföll í álverinu í Straumsvík,“ segir Stefán Sveinbjörnsson, framkvæmdastjóri VR. Efasemdir hafa verið uppi um hvort heimild sé innan hvers samflotsfélaganna fjögurra að standa sameiginlega undir kostnaði vegna verkfalla.

Forsvarsmenn verkalýðsfélaganna hafa viðrað hugmyndir sínar um skipulögð skæruverkföll minni hópa ef kemur til verkfallsaðgerða líkt og nú stefnir í. Félögin hafa talað um að standa sameiginlega undir kostnaði vegna þessara verkfalla úr verkfallssjóðum sínum. Þannig að ef senda á tiltekinn hóp félagsmanna Eflingar í verkfall muni öll félögin taka þátt í kostnaðinum, hlutfallslega eftir stærð þeirra, við að láta viðkomandi félagsmenn halda fullum launum.

Ljóst er þá að mikið mun mæða á verkfallssjóði stærsta félagsins, VR, sem samkvæmt síðasta ársreikningi stóð í 3,6 milljörðum króna en er í dag líklega nær fjórum milljörðum og ríflega það ef marka má ummæli formanns VR í síðustu viku um sjóðinn sem er í stýringu hjá Kviku banka.

Sjóður Eflingar, næststærsta stéttarfélagsins, stóð í í tæpum 2,7 milljörðum króna samkvæmt síðasta ársreikningi en hefur vafalaust vaxið síðan þá.

Áætla má því að stóru félögin leggi til um og yfir sjö milljarða í digrum verkfallssjóðum sínum.

Aðspurður um fordæmi þessa að verkfallssjóðum mismunandi félaga sé deilt með þessum hætti jánkar Stefán því og vísar til verkfallsaðgerða í Straumsvík.

„Þar sem starfsmenn við upp- og útskipun fóru í verkfall fyrir alla starfsmenn í Straumsvík. Kostnaði var deilt á milli stéttarfélaga sem eru með samning við álverið í Straumsvík.“

Samflotsfélögin fjögur, VR, Ef ling, Verkalýðsfélag Akraness og Verkalýðsfélag Grindavíkur, lýstu á fimmtudag viðræðum við Samtök atvinnulífsins hjá Ríkissáttasemjara sem árangurslausum og var þeim slitið. Í dag, klukkan 10.00, hefst atkvæðagreiðsla um vinnustöðvun hjá ræstingafólki sem sér um þrif, hreingerningar og frágang á hótelum og gististöðum.

Verði vinnustöðvunin samþykkt hefst verkfall að morgni 8. mars og stendur til miðnættis sama dag.