Svipta stúlkuna sem gekk til liðs við ISIS ríkisborgararétti

Innanríkisráðuneyti Bretlands hyggst svipta Shamima Begum ríkisborgararétti. Begum, sem er nítján ára gömul, gekk til liðs við ISIS þegar hún var fimmtán ára gömul. Þetta kemur fram í frétt The Guardian.

Begum var fimmtán ára gömul þegar henni og tveimur vinkonum hennar tókst að ferðast frá Bretlandi til Sýrlands og ganga til liðs við Íslamska ríkið. Nú er hún nítján ára gömul og eignaðist nýverið dreng en tvö önnur börn hennar hafa látist.

Lögmaður fjölskyldu Begum segir fjölskylduna vera vonsvikna yfir ákvörðun ráðuneytisins og þau ætli sér að leita allra leiða til þess að koma í veg fyrir þetta. Þá hefur Begum kallað eftir því að breska þjóðin sýni sér samúð en hún vill snúa aftur til landsins til þess að geta búið í friði með barninu sínu.