Martial gæti skrifað undir á morgun

Samkvæmt frönskum fjölmiðlum þá er Frakkinn Anthony Martial að ná saman við Man. Utd um nýjan samning og jafnvel verður skrifað undir samninginn á morgun.

Umboðsmaður Martial sagði síðasta sumar að leikmaðurinn vildi fara frá félaginu. Þáverandi stjóri félagsins, Jose Mourinho, var sáttur við að leyfa honum að fara en stjórn félagsins var ekki á sama máli og tók í taumana.

Staðan hefur mikið breyst síðan þá og Martial er farinn að brosa undir stjórn Ole Gunnar Solskjær. Eftir nokkurra mánaða samningsviðræður eru menn farnir að sjá til lands.

Núverandi samningur leikmannsins er til ársins 2020. Martial hefur skorað 46 mörk í 161 leik fyrir Man. Utd.