Sigvaldi: Fullt sem við getum gert betur

„Þetta var mjög erfitt. Fyrstu 15 mínúturnar voru hundleiðinlegar, við komumst ekkert í færi og þeir fengu létt mörk. Svo komumst við inn í leikinn aftur og fórum fjórum mörkum undir í hálfleik sem sýnir flottan karakter í liðinu,“ sagði Sigvaldi Björn Guðjónsson í samtali við Tómas Þór Þórðarsson eftir tapið gegn Frökkum í Lanxess-arena í Köln í kvöld.

Ísland skoraði ekki mark fyrstu 12 mínútur leiksins og komust Frakkar þá í 6-0. Þeir komu sér þó inn í leikinn líkt og Sigvaldi segir og staðan í hálfleik var 15-11 Frökkum í vil.

„Ég veit ekki alveg hvað gerist í seinni hálfleik, hvort menn eru þreyttir. Mér fannst vanta eitthvað en þetta er eitt af bestu liðum í heimi og við erum ungir, þetta er reynsla,“ bætti Sigvaldi við.

„Við sýndum að við getum staðið í bestu liðunum. Við þurfum að fara heim og horfa á þessa leiki og sjá hvað við getum gert betur. Það er fullt sem við getum gert betur og okkar vantar okkar bestu menn þannig að við eigum fullt inni.“