Verður T.J. Dillashaw tvöfaldur meistari?

Í kvöld mætast þeir Henry Cejudo og T.J. Dillashaw um fluguvigtartitil UFC. Dillashaw getur skrifað nafn sitt á spjöld sögunnar með sigri en það gæti reynst dýrt fyrir aðra bardagamenn.

Ríkjandi bantamvigtarmeistari (61 kg), T.J. Dillashaw, fer niður í fluguvigt (57 kg) og skorar á meistarann Henry Cejudo. Aðeins þremur keppendum hefur tekist að verða meistari í tveimur þyngdarflokkum á sama tíma í UFC og ætlar Dillashaw að verða sá fjórði. Árið 2018 var ár ofurbardaganna enda urðu þau Daniel Cormier og Amanda Nunes tvöfaldir meistarar á síðasta ári en fram að því hafði aðeins Conor McGregor leikið það eftir.

Dillashaw þurfti að leggja mikið á sig til að geta komið sér niður í 125 pundin. Dillashaw náði tilsettri þyngd í gær og sagði að niðurskurðurinn hefði verið gífurlega vísindalega undirbúinn. Hann var eðlilega grennri og meira skorinn en oft áður en Dillashaw leit ekki út fyrir að vera þjáður og skraufþurr í vigtuninni í gær.

Fluguvigtin í UFC hefur oft átt undir högg að sækja og ekki alltaf fengið náð fyrir augum bardagaaðdáenda. Nokkrir bardagamenn í fluguvigtinni hafa fengið sparkið á síðustu mánuðum og fengið þau skilaboð að UFC ætli að leggja niður þyngdarflokkinn. Demetrious Johnson var fyrsti og eini meistarinn í sögu þyngdarflokkins í UFC þar til Henry Cejudo sigraði hann í fyrra. Nú er talið að ef Dillashaw vinni fluguvigtarbeltið verði flokkurinn hreinlega lagður niður í UFC. Henry Cejudo er því ekki bara að verja sinn titil heldur mögulega að verja starfsöryggi kollega í þyngdarflokknum.

Á blaðamannafundinum á fimmtudaginn mætti Cejudo með gervisnák en Dillashaw var kallaður „snákur í grasinu“ af Conor McGregor og svikari. Dillashaw hefur aftur á móti tekið þessu viðurnefni opnum örmum og er kennimerki hans í dag snákur. Cejudo tók gervisnák úr poka og lamdi honum í gólfið til marks um hvað hann ætli sér að gera við Dillashaw í kvöld. Menn fara greinilega sínar leiðir til að vekja athygli.

Bardagakvöldið í kvöld markar nýtt upphaf hjá UFC í Bandaríkjunum en það verður það fyrsta sem sýnt verður á ESPN sjónvarpsstöðinni. Fyrrum NFL-maðurinn Greg Hardy er í næstsíðasta bardaga kvöldsins þrátt fyrir að vera aðeins að berjast sinn fyrsta bardaga í UFC. Kvöldið er hlaðið skemmtilegum bardögum og verður sýnt í beinni á Stöð 2 Sport kl. 3 í nótt.