Umhverfisráðherra sagði hjarta jöklanna að hverfa

Orkuskipti í samgöngum og aukin kolefnisbinding voru á meðal þess sem Guðmundur Ingi Guðbrandsson, umhverfisráðherra, lofaði að Íslandi myndi gera til að standa við skuldbindingar sínar gagnvart Parísarsamkomulaginu í ræðu á loftslagsráðstefnu Sameinuðu þjóðanna í Póllandi í dag. Harmaði hann að jöklar Íslands færu hopandi.

Í upphafi ræðu sinnar lýsti ráðherrann upplifun sinni af tveimur jökultungum sem saman römmuðu inni hjartalaga fjall á Miðhálendi Íslands í kringum aldamótin.

„Nú með bráðnun jöklanna hefur lögun fjallsins breyst. Hjartað er að mást út,“ sagði Guðmundur Ingi.

Lýsti hann nýrri aðgerðaáætlun Íslands í loftslagsmálum. Ísland hefði þegar náð fullum orkuskiptum í endurnýjanlega orkugjafa í raforkuframleiðslu og húshitun. Þau skipti hefðu kostað Íslendinga en fjárfestingin hafi haft mikla kosti í för með sér. Næst standi fyrir dyrum orkuskipti í samgöngum.

Hvatti ráðherrann ríkis heims til dáða og ganga lengra í að draga úr losun

„Ísland mun standa við Parísarskuldbindingar sínar fyrir 2030 en við verðum líka að horfa lengra fram á veginn. Langtímamarkmið íslands er að ná kolefnishlutleysi fyrir árið 2040,“ sagði Guðmundur Ingi.

Til þess að mannkynið næði kolefnishlutleysi fyrir miðja öldina eins og nauðsynlegt er til að markmið Parísarsamkomulagsins náist sagði ráðherrann að sum ríki þyrftu að vera fyrri til.

„Þróuð ríki ættu að setja fordæmi og vera í fararbroddi í að ná kolefnishlutleysi,“ sagði hann.

Verra í vændum taki ríki ekki mark á vísindunum

Umhverfisráðherra virtist skjóta óbeint á nokkur olíuframleiðsluríki eins og Bandaríkin, Rússland, Sádi-Arabíu og Kúveit sem lögðust gegn samþykkt um vísindaskýrslu um 1,5°C-markmið Parísarsamkomulagsins.

„Ísland fagnar skýrslunni og telur að hún sé ómissandi leiðarljós fyrir vinnuna framundan,“ sagði ráðherrann.

Ríkin fjögur vildu ekki nota orðalagið „að fagna“ í ályktun fundarins um skýrsluna og lögðu þess í stað til að talað væri um að hann „tæki eftir“ henni.

Sagði Guðmundur Ingi að loftslagsbreytingar væru nú þegar raunveruleiki og veðuröfgar væru orðnar að venjulegu ástandi. Verra sé í vændum taki ríki heims ekki mark á vísindunum og auki metnað sinn.

„Hjartalagaða jökulfjallið sem ég sá við aldamótin verður kannski bráðum horfið en það er svo mörgu sem við getum bjargað. Við höfum enn tíma. Saman getum við lagt hjartað í þetta,“ sagði ráðherrann.