Mótmæla harðlega ákvörðun Húsasmiðjunnar að loka verslun sinni

Bæjarstjórn Fjarðabyggðar mótmælir harðlega þeirri ákvörðun Húsasmiðjunnar að loka verslun sinni á Reyðarfirði.

Í bókun bæjarstjórnarinnar segir að það skjóti skökku við að fyrirtæki eins og Húsasmiðjan sjái sér ekki fært að reka verslun í sveitarfélagi eins og Fjarðabyggð þar sem langstærsti hluti veltu fyrirtækja á Austurlandi verður til.

Eru það sögð sérstök vonbrigði í ljósi fundar sem haldinn var að undirlagi Fjarðabyggðar með stjórnendum Húsasmiðjunnar í lok ágúst síðastliðnum þar sem kom fram að ekki stæði til að loka versluninni á Reyðarfirði heldur reyna að sækja frekar fram í rekstri hennar.

„Sú mikla þjónustuskerðing sem nú fer fram, í boði stórfyrirtækja á landsvísu, og virðist helst beinast að landsbyggðinni er með öllu ólíðandi og hvetur bæjarstjórn Fjarðabyggðar stofnanir sveitarfélagsins og íbúa alla að beina viðskiptum sínum til fyrirtækja sem hér starfrækja þjónustu í sveitarfélaginu.”