Conor McGregor snýr aftur í búrið í kvöld

UFC 229 fer fram í kvöld frá Las Vegas í Bandaríkjunum. Í aðalbardaga kvöldsins fáum við að sjá Conor McGregor aftur í búrinu eftir tveggja ára fjarveru.

Conor McGregor hefur ekki barist í MMA síðan hann sigraði Eddie Alvarez í nóvember 2016. Þá varð hann sá fyrsti í sögu UFC til að vera ríkjandi meistari í tveimur þyngdarflokkum á sama tíma. Á meðan Conor var í burtu var hann sviptur báðum titlum sínum, eignaðist sitt fyrsta barn, komst í kast við lögin, Daniel Cormier lék sama afrek og varð meistari í tveimur þyngdarflokkum á sama tíma og Khabib Nurmagomedov vann beltið sem Conor tapaði aldrei.

Conor sat þó ekki í sófanum allan tímann en í ágúst í fyrra mætti hann Floyd Mayweather í boxbardaga sem hann tapaði. Nú í kvöld snýr hann hins vegar aftur á sinn gamla heimavöll í búrið.

Það er alltaf stór viðburður þegar Conor McGregor berst. Bardaginn í kvöld er einn sá stærsti, ef ekki sá stærsti, í sögu UFC. Dana White, forseti UFC, sagði fyrir nokkrum vikum síðan allt benda til að UFC bardagakvöldið myndi selja 2,5 milljónir áskrifta (e. Pay Per View). Á fimmtudaginn sagði hann að tölurnar gætu jafnvel farið í 3 milljónir en gamla metið er 1,6 milljón áskriftir þegar Conor mætti Nate Diaz.

Bardaginn er risastór og eiga þeir Conor og Khabib langa forsögu. Allt ætlaði um koll að keyra í apríl þegar Conor réðst að rútu með Khabib innanborðs og kastaði trillu í gegnum rúðu rútunnar.

Blaðamannafundirnir með þeim tveimur hafa verið óvenju pólitískir og Conor skotið á mennina sem eru í kringum Khabib. Það er Conor ekkert heilagt þegar kemur að hugarleikjum við andstæðinginn fyrir bardagann.

Burtséð frá öllum rútuárásum og skítkasti er bardaginn virkilega áhugaverður. Hér eru að mætast tveir ólíkir stílar með ólíka styrkleika. Conor er sá færasti í standandi viðureign í MMA í dag á meðan Khabib er einn besti glímumaðurinn í MMA í dag. Khabib verður að taka Conor niður á meðan Conor verður að halda þessu standandi.

Báðir hafa þeir átt ótrúlegan feril í UFC til þessa. Khabib er taplaus og hefur reyndar ekki ennþá tapað lotu í 10 bardögum í UFC. Conor er með níu sigra og eitt tap en af sigrunum níu hafa sjö komið eftir rothögg.

Conor fær í kvöld tækifæri á að endurheimta léttvigtarbeltið sem hann tapaði aldrei og Khabib getur varið beltið sitt í fyrsta sinn. Ekki missa af þessum frábæra bardaga en viðureignin er aðalbardaginn á UFC 229 í nótt. Bardagakvöldið verður í beinni útsendingu á Stöð 2 Sport kl. 2 í nótt og verða fimm bardagar á dagskrá.