Feðgarnir sem skutu nágranna sinn til bana handteknir á nýjan leik

Feðgarnir John Miller og Michael Miller sem hafa verið ákærðir í Texas fyrir að skjóta Aaron Howard, nágranna þeirra, til bana þann 1. september vegna deilna um rusl, hafa verið handteknir á nýjan leik. Þeim hafði áður verið sleppt eftir að þeir greiddu hovr um sig tryggingu upp á 25.000 Bandaríkjadali, eða rúmlega 2,7 milljónir íslenskra króna.

Yfirlögmaður Taylor og Jones sýslu, þar sem atvikið átti sér stað, flutti á föstudag tillögu er laut að því að hækka tryggingargjald feðganna þar sem það hafi ekki verið nógu hátt til að byrja með. Tillagan hlaut náð í augum dómstóla og úr varð að tryggingargjald feðganna var tífaldað. Þeim hefur því verið gert að snúa aftur í fangelsi.

Feðgarnir voru eins og áður segir fyrst handteknir þann 1. september og sleppt stuttu síðar. Því furða margir sig á því hvers vegna tillagan um hækkun á tryggingargjaldi þeirra hafi ekki komið fyrr en raun ber vitni, en fjölmiðlar vestanhafs telja að vinsældir myndskeiðs af atburðinum sem Kara Box, eiginkona Howards, deildi á netinu hafi haft sitt að segja um viðbrögð stjórnsýslunnar við málinu.

Daginn áður en feðgarnir voru handteknir í annað skiptið hringdi blaðamaður í John Miller sem vildi ekki tjá sig um málið. Hann sagðist telja það svo að um einkamál á milli sín og Texas væri að ræða.

Myndskeiðið má sjá hér að neðan en rétt er að vara lesendur við því að það sem þar fer fram gæti vakið óhug.