Fyrst kvenna til að leiða norrænu ráðherranefndina

Paula Lehtomäki frá Finnlandi hefur verið valin til að taka við embætti framkvæmdastjóra Norrænu ráðherranefndarinnar. Lehtomäki tekur við embættinu af Norðmanninum Dagfinn Høybråten og tekur til starfa í mars 2019.

Í frétt á vef Norðurlandaráðs kemur fram að norrænu samstarfsráðherrarnir, undir forystu Margot Wallström frá Svíþjóð, hafi valið Paulu Lehtomäki en hún er nú ráðuneytisstjóri í forsætisráðuneyti Finnlands. Hún er fyrsta konan til að gegna embættinu.

Haft er eftir Lehtomäki að hún hlakki til að takast á við nýjar áskoranir. „Mér finnst norrænt samstarf skipta vaxandi máli og ég hlakka mikið til að fá tækifæri til þess að vera í fullu starfi við að sinna því. Norðurlöndin er nánasta fjölskyldan í heimi þar sem framtíðin er óráðin, bæði fyrir mig persónulega og fyrir Finnland,“ segir Lehtomäki.

Paula Lehtomäki var kjörin á finnska þingið árið 1999 og sat á þinginu í sextán ár. Hún varð utanríkis- og þróunarmálaráðherra árið 2003 og gegndi embætti umhverfisráðherra árin 2007 til 2011.