Lét ekki vita af slysasleppingu regnbogasilungs við Húsavík

Slysaslepping á regnbogasilungi varð úr eldisstöð N-lax að Auðbrekku í Húsavík í síðasta mánuði. Rekstraraðili tilkynnti ekki um sleppingu eins og skylt er samkvæmt lögum um fiskeldi, að því er fram kemur í tilkynningu frá Matvælastofnun um málið.

Við slátrun úr einu keri fyrirtækisins losnaði rist af niðurfallsröri í kerinu og fiskar komust í frárennsli stöðvarinnar sem rennur í fráveitukerfi Húsavíkur. Fyrir liggur að eldisfiskar bárust í fráveitu bæjarins.

Í tilkynningu Matvælastofnunar segir að umfang slysasleppingarinnar sé óljóst en það sé ekki talið verulegt. Samkvæmt upplýsingum frá N-lax má ætla að um 300 regnbogasilungar hafi verið í kerinu þegar atvikið átti sér stað og uppgefnar sláturtölur gefi til kynna að hátt hlutfall þeirra hafi skilað sér í slátrun.

Matvælastofnun segir enga hreinsun í fráveitukerfinu og því ekki hægt að útiloka að lifandi fiskur hafi borist til sjávar. Eldisfiskurinn sé ófrjór og geti ekki fjölgað sér í íslenskri náttúru.

Kveikjan að rannsókn málsins var ábending til Matvælastofnunar í lok síðustu viku um slysasleppingu hjá N-lax. Við eftirlit Matvælastofnunar 4. september síðastliðinn var farið yfir atburðarás atviksins, búnað og viðbrögð fyrirtækisins. Viðbrögð fyrirtækisins voru ekki samkvæmt skráðu verklagi þess.

Jafnframt var Fiskistofu ekki tilkynnt um sleppinguna eins og lög kveða á um. Matvælastofnun tilkynnti Fiskistofu um málið og er það til áframhaldandi skoðunar.