Guðbjörg tvöfaldur Norðurlandameistari

Guðbjörg Jóna Bjarnadóttir er tvöfaldur Norðurlandameistari 19 ára og yngri í spretthlaupum. Hún vann 100 metra hlaup í gær og tók gullið í 200 metrunum í dag.

Guðbjörg Jóna hljóp á 23,51 sekúndum. Hún var 10 sekúndubrotum undir Íslandsmeti sínu sem hún setti í Liechtenstein í sumar en meðvindur mældist yfir leyfilegum mörkum í dag og því telur tíminn ekki í því samhengi.

Tiana Ósk Whitworth varð önnur, níu sekúndubrotum á eftir Guðbjörgu. Hún tók einnig silfrið í 100 metra hlaupinu í gær og Ísland vann því tvöfalt í bæði 100 og 200 metra hlaupi.

Guðbjörg Jóna varð fyrr í sumar Evrópumeistari í flokki 18 ára og yngri í 100 metra hlaupi.