Lykilatriði að forðast sandgryfjurnar

Valdís Þóra Jónsdóttir, atvinnukylfingur úr Golfklúbbnum Leyni, hefur leik í dag á Opna breska meistaramótinu í golfi sem fram fer á Royal Lytham & St. Annes-golfvellinum, hundrað kílómetra norður af Liverpool-borg. Er þetta í 42. skiptið sem Opna breska meistaramótið fer fram í kvennaflokki og annað árið í röð sem Ísland á fulltrúa á mótinu.

Er þetta fjórða risamót ársins í kvennagolfi af fimm og verður þetta annað risamótið sem Valdís tekur þátt í á eftir Opna bandaríska meistaramótinu í fyrra. Missti hún þá af niðurskurði

Valdís komst inn á Opna breska með góðum árangri sínum á Evrópu­mótaröðinni, næststerkustu atvinnumannamótaröð heims. Er hún í 20. sæti á stigalista mótaraðarinnar en efstu 25 kylfingarnir fengu sæti á þessu risamóti.

Ólafíu Þórunni Kristinsdóttur, GR, tókst ekki að komast inn á Opna breska í ár eftir að hafa tekið þátt í mótinu í fyrra.

Nóg af sandgryfjum

Völlurinn sem leikið er á er sögufrægur en hann var byggður árið 1886. Er völlurinn strandarvöllur (e. links) og ekki langur sem slíkur, rúmlega sex þúsund metrar eða 6.585 jardar. Engar vatnstorfærur eru á vellinum en þess í stað eru alls 204 sandgryfjur á brautunum átján tilbúnar að taka við golfboltum ef höggið geigar.

Er þetta í fimmta sinn sem Opna breska meistaramótið í kvennaflokki fer fram á vellinum. Tíu sinnum hefur Opna breska meistaramótið í karlaflokki farið þar fram, síðast árið 2012 og tvisvar hefur verið leikið um Ryder-bikarinn á vellinum, síðast árið 1977.

Flest stærstu nöfn kvennagolfsins mæta til leiks á mótið og hefur Valdís leik klukkan tíu í dag. Með henni í ráshóp eru þær Ursula Wikström frá Finnlandi og Daniela Darquea frá Ekvador.

Veðrið gæti truflað kylfinga

Valdís virtist nokkuð brött í aðdraganda mótsins en henni fannst völlurinn nokkuð mjúkur vegna rigninga undanfarna daga.

„Tilfinningin er góð, það er afar gaman að fara á þetta risamót og fá að spila þennan flotta völl sem er í hæsta gæðaflokki. Markmiðið er að spila eins vel og hægt er og sjá hverju það skilar mér, vonandi næ ég góðu skori á völlinn,“ sagði Valdís.

Hún hefur eytt undanförnum dögum í að leika völlinn og segir hann góðan en ólíkan þeim sem hún spilaði á í Aberdeen í Skotlandi, fyrir viku.

„Hann er örlítið mýkri en völlurinn í Aberdeen sem ég lék á í Skotlandi um daginn eftir rigninguna síðustu daga og það er von á rigningu á fyrsta degi. Það eru nokkrar par 4 holur sem eru ansi langar og svo á móti eru nokkrar sem eru nokkuð stuttar.“

Í næstu viku keppir Valdís svo ásamt Ólafíu fyrir hönd Íslands á Evrópumóti í liðakeppni atvinnukylfinga í Skotlandi í næstu viku. Er þetta í fyrsta sinn sem þetta mót fer fram og er leikið á velli sem Ólafía og Valdís léku á síðustu viku.

Völlur sem gefur kylfingum tækifæri til að sækja

Sigmundur Einar Másson, Íslandsmeistari í höggleik 2007, lék á sínum tíma Royal Lytham & St. Annes-völlinn á Opna breska áhugamannamótinu í golfi. Lék hann völlinn á 77 höggum. Blaðamaður Fréttablaðsins fékk hann til að rýna í völlinn í aðdraganda mótsins.

„Þetta er hefðbundinn strandarvöllur en endar á sex par 4 holum í röð sem er frekar sjaldgæft, rétt eins og að byrja á par 3 holu. Það er ekki mikið landslag í flötunum en eins og á flestum strandarvöllum eru djúpar sandgryfjur sem verja flatirnar. Gott dæmi um það er níunda holan, par 3 hola sem er ekkert mjög löng en flötin er varin af níu sandgryfjum. Ef kylfingur kemst í gegnum mótið án þess að fara í sandinn er það kraftaverk,“ sagði Sigmundur Már léttur og bætti við:

„Lykillinn að góðu gengi er að sleppa eins mikið við glompur og hægt er og að pútta vel, þá mun henni ganga vel. Valdís er frábær með pútterinn þannig að það verður gaman að fylgjast með henni á mótinu. Það er spáð erfiðu veðri fyrstu tvo dagana sem gæti haft áhrif á keppendur en um helgina er rólegt veður sem gefur kylfingum tækifæri til að skora.“