Sló út í réttinum

Rafmagnslaust varð í dómsal í Milimani-dómstólnum í Naíróbí, höfuðborg Kenía, á meðan réttað var yfir fjórtán núverandi og fyrrverandi yfirmönnum ríkisrekna orkufyrirtækisins Kenya Power.

Föstum skotum var skotið á Kenya Power á Twitter og var fyrirtækið jafnvel sakað um að taka rafmagnið af húsinu til þess að tefja réttarhöldin.

Því neitaði Kenya Power þó og sagði að vandamálið mætti líklega rekja til skemmdra raflagna í húsinu sjálfu. Ákæran á hendur yfirmönnunum er í sex liðum og eru þeir meðal annars sakaðir um að hindra framgang réttvísinnar, að ofrukka viðskiptavini og um illa meðferð almannafjár.

Sakborningarnir voru handteknir á sunnudaginn.