Ronaldo: Ekki tíminn til þess að ræða framtíðina

Portúgal er úr leik á HM í Rússlandi eftir 2-1 tap fyrir Úrúgvæ í 16-liða úrslitunum í gær. Cristiano Ronaldo vildi ekki ræða um framtíð sína eftir leikinn.

Heimsmeistaratitillinn er eini stóri titillinn sem Ronaldo hefur ekki unnið á ferlinum. Hann verður 37 ára þegar HM hefst á ný í Katar 2022.

„Núna er ekki tíminn til þess að ræða framtíðina, hvorki leikmanna né þjálfara,“ sagði Ronaldo eftir leikinn í gær.

„Við erum með frábæran hóp af ungum leikmönnum með mikinn metnað og liðið mun halda áfram að vera á meðal þeirra bestu.“