Reykjavík aldrei vinsælli meðal Bandaríkjamanna

Reykjavík er þriðji vinsælasti áfangastaður bandarískra ferðamanna, rétt á eftir stórborgunum París og Lundúnum.

Í úttekt Allianz Global Assistance kemur fram að vinsældir Reykjavíkur hafi aukist mikið í Bandaríkjunum á undanförnum árum. Þannig hafi Reykjavík verið 17 vinsælasti áfangastaðurinn í fyrra og í 28 sæti árið 2015, en er sem fyrr segir í þriðja sæti í ár.

Rannsókn Allianz byggir á tölum frá nokkrum vinsælum bókunarsíðum um keyptar ferðir frá bandarískum flugvöllum á tímabilinu 28. maí til 3. september.

Allianz rekur vinsældir Reykavíkjur til lægra fargjalds, fallegrar náttúru og litríkra húsa höfuðborgarinnar sem hefur svo skilað sér í fallegum myndum á samfélagsmiðlum. „Þrátt fyrir umræðuna um mikinn ferðamannafjölda og vangaveltur um hvort skuli takmarka fjölda þeirra, þá halda vinsældir Reykjavíkur áfram að aukast,“ er haft eftir Allianz á vef Travel Weekly.

Tíu vinsælustu borgirnar samkvæmt Allianz eru eftirfarandi:

1. Lundúnir
2. París
3. Reykjavík
4. Róm
5. Amsterdam
6. Dyflinni
7. Barcelona
8. Aþena
9. Madríd
10. Frankfurt