Heilgalli Serenu vakti heimsathygli

Besta tenniskona allra tíma er mætt aftur á risamót eftir barnsburð og það var ekki bara spilamennska hennar sem sló í gegn heldur líka klæðnaðurinn.

Tenniskonur eru alla jafna í stuttum pilsum en Serena mætti í flottum heilgalla með bleikri rönd um mittið. Klæðnaður sem hefur ekki sést áður en aðdáendur hennar elsku gallann.

Þessi galli er ekki enn til sölu hjá Nike en líklegt má telja að hann verði kominn þangað áður en langt um líður.

Serena hefur oft vakið athygli fyrir klæðaburð á velli en talað var um að hún hefði ekki vakið svona mikla athygli fyrir klæðaburð síðan hún mætti í „kattagallanum“ frá Puma á US Open árið 2002. Það er svolítið síðan.

Serena var að spila við Krystinu Pliskova í dag og þurfti að hafa fyrir sigrinum.

Hún er augljóslega enn ryðguð og það tók hana 51 mínútu að vinna fyrsta settið, 7-6. Hún þurfti líka að hafa fyrir seinna settinu en marði það, 6-4. Hún fagnaði gríðarlega enda að stíga erfitt skref í rétta átt.

Síðasta risamót Serenu var í Ástralíu í janúar árið 2017. Þá var hún gengin átta vikur en náði samt að vinna mótið. Ótrúleg íþróttakona.