Telur brýnt að draga úr tekjutengingum í almannatryggingakerfinu

Formaður Landssambands lífeyrissjóða segir afar brýnt að draga úr tekjutengingum í almannatryggingakerfinu sem séu þær hæstu sem honum er kunnugt um. Lífeyrisþegum finnist þeir ekki njóta ávinningsins af því að hafa greitt í lífeyrissjóði vegna þess hve tekjutengingarnar séu miklar.

Breyting á almannatryggingalöggjöfinni tók gildi í ársbyrjun 2017. Þá voru frítekjumörk atvinnutekna, lífeyrissjóðstekna og fjármagnstekna afnumin en eitt almennt frítekjumark lögfest upp á 25.000 krónur. Í ársbyrjun 2018 var frítekjumark á atvinnutekjur svo hækkað í 100 þúsund krónur.

Þorbjörn Guðmundsson formaður Landssamtaka lífeyrissjóða segir skerðingarnar með því hæsta sem gerist og brýnt að breyta þeim.

„Mönnum finnst sem þeir séu ekki að njóta ávinningsins af því að hafa greitt inn í lífeyrissjóði vegna þess hversu tekjutengingarnar eru miklar í almannatryggingakerfinu. Þær eru 45% af almennum lífeyri og allt upp í 56,9 prósent með heimilisuppbót. Þessi mikla tekjutenging þekkist hvergi nema á Íslandi,“ segir Þorbjörn.

Hann segir mikilvægt að taka á þessu.

„Það er þetta sem mér finnst vera brýnast að taka á. Það er mín skoðun að menn hafi verið að innleiða eitthvað sem að hugsanlega verður í framtíðinni þegar réttindi lífeyrissjóðanna verða orðin miklu meiri en þau eru í dag. Það er mjög mikilvægt að draga úr þessum miklu tekjutengingum.“

Þorbjörn Guðmundsson kveðst hafa komið athugasemdum sínum á framfæri við stjórnvöld.

„Við höfum auðvitað verið að beina þessu til stjórnvalda. Landssamtökin tóku ekki þátt í breytingum á almannatryggingalöggjöfinni og hefðum gert alvarlegar athugasemdir við þær ef við hefðum verið þar.“