Ungir Íslendingar eru óhamingjusamari en þeir eldri

Íbúar í Vogum á Vatnsleysuströnd eru hamingjusamastir og Skagamenn eru ólíklegastir til að flytjast á brott á næstu tveimur árum. Þetta er meðal niðurstaðna hagfræðingsins Vífils Karlssonar sem unnið hefur að skýrslunni Íbúakönnun á Íslandi – staða og mikilvægi búsetuskilyrða 19 landsvæða á landsbyggðunum frá Hornafirði í austri að Skagafirði í norðri undanfarin ár. Skýrslan og könnunin sem hún byggir á verður kynnt í Allsherjarbúð, sal Sambands íslenskra sveitarfélaga í dag.

Í könnuninni var leitast við að kanna almenna velferð íbúanna, ánægju þeirra, framtíðaráhorf, búsetuskilyrði sem og stöðu 40 þátta er tengjast búsetuskilyrðum. Skagafjarðarsýsla fær hagstæðustu niðurstöðuna úr þáttunum 40 og fékk 77% hærri einkunn en það landsvæði sem fékk lægstu einkuninna. Akranes og Hvalfjörður koma fast á eftir en Vestmannaeyjar eru í þriðja sæti.

Fram kemur í tilkynningu að meginmarkmið könnunarinnar hafi verið að draga fram afstöðu íbúa einstakra landshluta til ýmissa þátta sem telja má meðal „mikilvægustu búsetuskilyrða heimilanna.“ Auk þess var grennslast fyrir um hvort fólk íhugaði brottflutning og ánægju þess með að búa á viðkomandi stöðum.

Könnun Vífils leiddi eftirfarandi í ljós:

• Íbúar í Vogum á Vatnsleysuströnd eru hamingjusamastir.
• Ungir Íslendingar eru óhamingjusamari en þeir eldri.
• Íbúar á norðanverðum Vestfjörðum eru ánægðastir með búsetusvæði.
• Íbúar á Akranesi og í Hvalfirði eru ánægðastir með sveitarfélögin sín.
• Skagamenn eru auk þess ólíklegastir til að flytjast á brott á næstu tveimur árum.
• Þeir sem búa fjær höfuðborgarsvæðinu eru óánægðari með fjarskipta- og samgöngumál en nágrannar þess.
• Nágrannar höfuðborgarsvæðisins eru óánægðari með heilsugæslu og þjónustu við aldraða en þeir sem búa fjær því.

Skýrslan verður sem fyrr segir kynnt í dag, klukkan 13 í Allsherjarbúð.