Haukakonur fengu glæsilegt hálsmen til minningar um Íslandsmeistaratitilinn

Haukar urðu Íslandsmeistarar í Domino´s-deild kvenna á síðustu leiktíð eftir sigur á Val í oddaleik.

Í bandarískum íþróttum þykir það siður að meistarar fái svokallaðan meistarahring skreyttan með demöntum og gulli en Haukarnir fóru aðra en þó svipaða leið.

Skartgripaverslunin Sign hannaði fyrir liðið glæsilegt hálsmen til minningar um Íslandsmeistaratitilinn. Sannkallað meistarahálsmen.

Stelpurnar fengu hálsmenið á lokahófi körfuknattleiksdeildarinnar þar sem þær voru stjörnurnar eftir að verða Íslandsmeistarar.