Bjarni Ófeigur samdi við FH

Skyttan Bjarni Ófeigur Valdimarsson hefur gengið til liðs við FH í Hafnarfirði og skrifað undir tveggja ára samning við félagið.

Bjarni Ófeigur kemur frá Val, en hann var á láni hjá Gróttu bróðurpart nýliðins tímabils.

„Það er ánægjulegt þegar ungir og efnilegir leikmenn velja FH fram yfir aðra kosti sem þeir hafa,“ sagði Ásgeir Jónsson formaður handknattleiksdeildar FH við heimasíðu félagsins.

„Bjarni Ófeigur mun fá stórt hlutverk hjá okkur næstu árin, við höfum mikla trú á drengnum og það verður virkilega spennandi að sjá hann í FH treyjunni næstu árin.”

Bjarni Ófeigur er fæddur árið 1998 og hann lék 18 leiki með Gróttu í Olís deildinni í vetur þar sem hann skoraði 88 mörk.