Blikar áfram með konu við stjórnvölinn: Margrét tekur við af Hildi

Margrét Sturlaugsdóttir verður næsti þjálfari kvennaliðs í Domino´s deild kvenna en Breiðablik gekk frá ráðningu hennar í dag.

Margrét tekur við af Hildi Sigurðardóttur sem stýrði liðinu á síðasta tímabili. Ásamt því að stýra meistaraflokknum mun Margrét halda áfram sem þjálfari yngri flokka hjá félaginu.

Blikar verða því áfram með konu í brúnni en Hildur var eina konan sem var aðalþjálfari í Domino´s deildinni á síðustu leiktíð.

Undir stjórn Hildar komu Blikar mjög á óvart á sínu fyrsta ári og voru með í baráttunni um úrvalsdeildarsæti þar til að liðið gaf aðeins eftir á lokakaflanum.

Margrét á það sameiginlegt með Hildi að hafa unnið marga Íslands- og bikarmeistaratitla á sínum ferli sem leikmaður í íslensku kvennadeildinni.

Margrét er þrautreyndur þjálfari með mikla reynslu af þjálfun síðan 1989. Hún hefur þjálfað lið Keflavíkur í Domino´s deildinni. Einnig er Margrét fyrst kvenna á íslandi til að komast inn í þjálfaranám FECC hjá FIBA og klárar það á næsta ári.

Lovísa Falsdóttir, elsta dóttir Margrétar, spilar með Breiðabliksliðinu í vetur.