Segir gjaldþrot Chuck ehf. bókhaldsklúður

Gjaldþrotaskipti Chuck ehf. sem stofnað var í apríl 2014 við opnun Chuck Norris Grill á Laugavegi má rekja til mistaka við bókhald. Þetta segir Jón Bjarni Steinarsson, rekstrarstjóri Chuck Norris Grill og Dillon í samtali við Vísi.

Vilhjálmur Sanne stofnaði Chuck ehf. í kringum rekstur veitingastaðarins Chuck Norris Grill en hafi rekið annað fyrirtæki, VSG-Eignir, til að halda utan um rekstur Dillon. Fyrir nokkrum árum síðan hafi honum verið bent á að best væri að sjá um rekstur beggja staðanna undir einu fyrirtæki. Vísir greindi frá gjaldþroti Chuck ehf. fyrr í dag. Úrskurður um gjaldþrot fyrirtækisins var kveðinn upp í Héraðsdómi Reykjavíkur þann 21. mars.

„Starfsfólk Dillon og starfsfólk Chuck starfa hjá sama fyrirtæki. Vörur eru allar keyptar í gegnum sama fyrirtæki,“ segir Jón Bjarni í samtali við Vísi.

„Þetta fyrirtæki var bara alltaf einhver bastarður. Það átti alltaf eftir að klára að ganga frá því. Nú er búið að því.“

Bókhaldsbull og mistök

Jón Bjarni og unnusta hans keyptu nýverið 50 prósenta hlut í VSG-Eignum og eiga helming á móti Vilhjálmi Sanne og eiginkonu hans. Unnusta Jóns Bjarna er Katrín Ólafsson og er hún einn skipuleggjenda tónlistarhátíðarinnar Secret Solsticce.

„Dillon og Secret Solstice hafa verið á sömu skrifstofu núna í eitt og hálft ár,“ segir Jón Bjarni.

„Það eru mikil samlegðaráhrif á þessum rekstri. Ég nota Dillon til að bóka artista fyrir Solstice. Við erum tónlistarstaður og tónlistarhátíð. Þetta fer saman.“

Jón Bjarni og Katrín skrifuðu undir kaupsamninga í byrjun mars.

„Fyrirtækið er í yfirferð hjá endurskoðanda, sem er eitthvað sem fylgir svona kaupum. Um leið og við komumst að þessu þá fóru endurskoðendur í það að klára ársreikninga og framtal og skila því inn, skiluðu því inn núna í síðustu viku. Ég er búinn að vera í góðum samskiptum við skiptastjórann,“ segir Jón Bjarni.

„Það að þetta fyrirtæki hafi farið á hausinn var bara smá bókhaldsbull og mistök. Það gleymdist aðeins að ganga frá þessu félagi í öllu hinu og það er núna bara búið að leiðrétta það. Félagið verður tekið til baka úr gjaldþrotaskiptum bara svo það sé hægt að ganga frá því og loka því almennilega.“