Vargöld í Lundúnum

Þingmenn og baráttusamtök í Bretlandi segja að stjórnvöld þar í landi ráði ekki við ofbeldisölduna sem nú ríður yfir höfuðborgina Lundúnir. Tveir unglingar voru skotnir til bana á mánudagskvöld og enn annar liggur alvarlega særður eftir stunguárás.

Vísir greindi frá árásunum í gærmorgun. Sautján ára stúlka var skotin er hún gekk um götur Tottenham-hverfisins í norðurhluta Lundúna og 16 ára strákur lést eftir að hafa verið skotinn skömmu síðar í einu af austari hverfum borgarinnar. Lögreglan rannsakar málin en ekki er vitað hvort þau tengist á þessari stundu. 

Bretar óttast að glæpatíðnin í höfuðborginni sé að verða sú hæsta í rúman áratug en fyrrnefndu morðin eru númer 47 og 48 sem framin eru í Lundúnum á þessu ári.

David Lammy, þingmaður Verkamannaflokksins, segist aldrei hafa séð annað eins ástand í borginni. Hann segir að rætur vandans liggi í undirheimunum og þá ekki síst meðal fíkniefnasala og notenda. Til að bæta gráu ofan á svart hafa stjórnvöld, undir forystu Íhaldsflokksins, skorið niður í velferðarmálum og er því félagsþjónusta af skornum skammti í mörgum þessara hverfa.

Sjá einnig: Unglingsstúlka myrt í Lundúnum

Borgarstjóri Lundúna, Sadiq Kahn, tekur í sama streng og segir að skýringanna sé að leita í niðurskurðarkröfu stjórnvalda. „Niðurskurður ríkisstjórnarinnar hefur lamað þjónustu við unga Lundúnarbúa,“ skrifaði Kahn á Twitter-síðu sína og kallaði jafnframt eftir auknum fjárframlögum til lögreglunnar svo hún gæti sinnt störfum sínum.

Borgarstjórinn hefur þó ekki sloppið við gagnrýni úr hinni áttinni. Talsmaður forsætisráðherrans Theresu May segir að Kahn beri sjálfur ábyrgð á því hvernig komið er fyrir löggæslunni í borginni, enda fer hann formlega með æðstu stjórn Lundúnarlögreglunnar.

Morðum hefur fjölgað jafnt og þétt í höfuðborginni það sem af er ári. Átta morð voru framin í Lundúnum í janúar, 15 í febrúar og svo 22 í mars síðastliðnum. Þrjú morð hafa ratað inn á borð Lundúnarlögreglunnar á þeim fjóru dögum sem liðnir eru af apríl. Ef fer sem horfir verða morðin orðin 180 talsins í lok árs. 

Fleiri morð hafa verið framin í Lundúnum á þessu ári en í New York.