Holloway í rosalegum niðurskurði

Næringarfræðingur fjaðurvigtarmeistara UFC, Max Holloway, segir að hann sé í sínum erfiðasta niðurskurði fyrir bardaga helgarinnar gegn Khabib Nurmagomedov.

Þá berjast þeir um léttvigtarbelti UFC og nái Holloway að koma heiminum á óvart þá verður hann aðeins annar tvöfaldi meistarinn í sögu UFC. Endurtekur leik Conor McGregor og tekur bæði beltin af honum.

Þó svo Holloway sé að berjast í flokki fyrir ofan sinn eigin þá er hann stór fjaðurvigtarkappi og fer alla jafna langt fyrir ofan þá þyngd á milli bardaga. Það vill enginn segja nákvæmlega hvað Holloway er þungur en næringarfræðingurinn George Lockhart segir að vikan verði martröð hjá Holloway. Segir að Holloway sé að jafna sinn stærsta niðurskurð.

Holloway fékk bardagann 1. apríl og það er vigtun á föstudag þannig að dagarnir eru erfiðir og það á hreinlega eftir að koma í ljós hvort hann nái niðurskurðinum yfir höfuð.

Andstæðingur hans, Nurmagomedov, hefur sjálfur átt í vandræðum með sinn niðurskurð fyrir bardaga en vonandi gengur allt eftir á endanum.