Tæplega 90 milljóna króna gjaldþrot Potts

Engar eignir fundust í búi Potts ehf. sem rak veitingahúsið Argentínu steikhús í tæplega þrjátíu ár við Barónstíg í Reykjavík. Félagið var úrskurðað gjaldþrota í mars í fyrra en um svipað leyti var rekstur Argentínu færður yfir á kennitölu Bos ehf., félags hvers forráðamaður og stjórnarformaður er Björn Ingi Hrafnsson.

Lýstar kröfur í gjaldþrot Potts ehf. námu 86 milljónum króna. Þar af voru veðkröfur um 15 milljónir króna, forgangskröfur 12 milljónir króna en almennar kröfur 59 milljónir króna. Engar greiðslur fengust upp í kröfurnar.

Argentína er eitt rótgrónasta veitingahús landsins en því var komið á fót árið 1989. Kristján Þór Sigfússon átti Pott ehf. en hann hafði verið annar eigenda Argentínu nánast frá upphafi eins og Fréttablaðið fjallaði um í október. Taprekstur hafði verið á Argentínu undanfarin ár og skuldabyrðing þung.

Eftir að Bos ehf. var stofnað af KPMG undir nafninu AB596 ehf. tók hæstaréttarlögmaðurinn Sigurður G. Guðjónsson við félaginu nokkrum dögum síðar. Nafni þess var breytt í Bos ehf., Sigurður er skráður stjórnarmaður og prókúruhafi þess og dóttir hans, Edda Sif Sigurðardóttir, ráðin framkvæmdastjóri samkvæmt tilkynningu til fyrirtækjaskrár.

Sigurður þvertók í samtali við Fréttablaðið fyrir að hafa nokkra aðkomu að félaginu í dag. Hann staðfesti þó að hafa komið að því að kaupa eignir Argentínu á sínum tíma. Hann er þó enn í dag skráður stjórnarmaður og með prófkúruumboð fyrirtækisins.

Sýslumaðurinn á höfuðborgarsvæðinu gerði í febrúar árangurslaust fjárnám í félaginu BOS ehf að því er Stundin greindi frá. Greiðsluáskoranir höfðu borist frá lífeyrissjóðum á innan við tveimur mánuðum eftir að hann tók við rekstrinum í haust.

Björn Ingi Hrafnsson var stjórnarformaður félagsins, en hann var sakaður um að hafa reynt að greiða skuldir með steikum.