Stökk upp á strætó og hékk á honum milli stoppistöðva

Íbúi í Vesturbæ náði ljósmyndum af því þegar stúlka hoppaði upp á strætisvagn og hékk utan á honum í töluverða stund í dag. Hann vonast til þess að foreldrar geri börnum sínum grein fyrir hættum sem fylgja athæfinu. Upplýsingafulltrúi Strætó tekur í sama streng.

Beggi Dan, íbúi í Vesturbæ, var á ferð með dóttur sinni síðdegis í dag. Feðginunum brá mjög í brún þegar stúlka hoppaði fyrirvaralaust upp á strætisvagn, sem keyrði á undan þeim, og hékk utan á honum þangað til hann nam staðar við næstu stoppistöð.

„Þessi stelpa hoppar aftan á strætóinn við stoppistöð þarna hjá hringtorginu,“ segir Beggi í samtali við Vísi og vísar þar til Hagatorgs, hringtorgs sem stendur við Hótel Sögu. Á milli Hagatorgs og Melaskóla er töluverður spölur, auk þess vagninn ekur um hringtorgið og því verða sveigjur og beygjur á vegi hans.

Varð að miðla atvikinu áfram

„Ég bara trúði þessu ekki. Hún klifraði upp á vagninn og heldur sér í eitthvað, mér fannst þetta bara alveg svakalegt. Ég var dauðhræddur um að hún myndi missa takið, þetta er eitthvað sem maður gerir ekki,“ segir Beggi.

„Svo er ég nú ekki vanur því að taka myndir undir stýri en mér fannst ég þurfa að miðla þessu áfram.“

Beggi ræddi málið vandlega við dóttur sína og hvetur aðra foreldra til að gera slíkt hið sama. Þá deildi hann auk þess myndum af atvikinu á sérstökum Facebook-hóp íbúa Vesturbæjar til að vekja athygli á málinu.

Beggi segir stúlkuna sem hoppaði upp á strætisvagninn að öllum líkindum hafa verið á aldrinum 12-14 ára. Þá hafi tvær stúlkur upphaflega hoppað á vagninn. Að sögn Begga kom önnur stúlkan sér þó aftur niður á jafnsléttu þegar hann skrúfaði niður rúðuna í bíl sínum og kallaði til þeirra.

Hvetja foreldra til að ræða við börn sín

Guðmundur Heiðar Helgason, upplýsingafulltrúi Strætó, segir í samtali við Vísi að þetta sé í fyrsta skipti sem svona atvik komi inn á borð til sín. Þá sé lítið sem Strætó geti aðhafst í málinu nema að vara við athæfinu.

„Við verðum bara að hvetja foreldra og forráðamenn til þess að tala við börn sín. Við viljum auðvitað vekja athygli á því að þetta er stórhættulegt.“