Jarð­skjálfta­hrina við Gríms­ey: Stærstu skjálftarnir eins og keyrt sé á húsið

Íbúar í Grímsey taka jarðhræringum í og við eyjuna af æðruleysi og stressa sig ekkert endilega á því þó að talað sé um að stærri skjálfti geti orðið.

Í samtali við náttúruvársérfræðing hjá Veðurstofu Íslands í dag var sagt að ekki væri útilokað að skjálftahrina í Öxarfirði í morgun sé tilkomin vegna skjálftahrinunnar fyrir norðan Grímsey og þar af leiðandi hafi spenna færst á milli.

Um miðjan dag höfðu á fjórða tug skjálfta orðið úti fyrir Kópaskeri og um hundrað við Grímsey. Í gær voru skjálftarnir á Grímseyjarbeltinu töluvert færri en undanfarnar vikur en hrinan hófst í lok janúar.

Íbúar í Grímsey hafa orðið misvarir við skjálftahrinuna sem enn er í gangi. Þeir urðu hins vegar allir varir við stóra skjálftann í upphafi vikunnar.

Drunur og hristingur

„Þetta er nú eiginlega bara búið að vera leiðinlegt, mikil hreyfing hérna og stærstu skjálftarnir, þegar þeir koma, þá virkar þetta eins og það sé keyrt á húsið hérna,“ segir Guðrún Gísladóttir, íbúi í Grímsey.

„Fyrst var þetta þannig að þetta var svona einn og einn að koma sem var yfir þrjá og þá eins og í þessu húsi þá heyrði maður svona eins og bíll hefði keyrt framhjá, svona drunur. En þessir stóru tveir, þá var hristingur,“ segir Alfreð Garðarsson, einnig íbúi í Grímsey.

Íbúar eyjunnar hafa tekið höndum saman á meðan skjálftavirknin hefur varað og segja umræðuna hafa verið mikla. Sumir tóku niður hluti til þess að valda ekki tjóni eða slysum.

„Við tókum eina þrjá hluti sem ég vil alls ekki missa, annað létum við bara eiga sig,“ segir Guðrún.

Alfreð tók niður tvær myndir í hjónaherberginu sem voru fyrir ofan rúmið.

„Fólki er ekkert alveg sama, sérstaklega þegar farið var að tala um það að við gætum kannski fengið stærri skjálfta,“ segir Guðrún.

Undir borð og gripið í borðfótinn

Skjálftarnir nú hafa einnig verið eitt aðalumræðuefnið hjá yngstu íbúum eyjunnar.

„Ég hef verið svolítið hrædd stundum en svo eru sumir svona litlir. En já, annars er allt í lagi ef þeir eru litlir en ef þeir eru aðeins þá er mér ekki vel við þá,“ segir Guðbjörg Inga Sigurðardóttir, 11 ára nemandi í Grímseyjarskóla.

En hvað á maður svo að gera þegar það kemur stór skjálfti?

„Fara undir borð og halda í borðfótinn því annars gæti það bara flogið frá,“ segir Hannes Logi Jóhannsson, einnig 11 ára, og sýnir fréttamanni hvernig maður á að gera.

Rætt var við Jóhannes Henningsson, formann hverfisráðs Grímseyjar, og Karen Nótt Halldórsdóttur, skólastjóra Grímseyjarskóla, í beinni útsendingu í fréttum Stöðvar 2 í kvöld. Aðspurður hvort að íbúar Grímseyjar séu ekki orðnir þreyttir á ástandinu sagði Jóhannes þetta vissulega hafa verið hundleiðinlegt.

„Jú, þetta er auðvitað búið að vera hundleiðinlegt. Ég held að það sé ekkert stress í fólki þannig, við finnum orðið ekkert fyrir þessu lengur. Þetta var svolítið leiðinlegt í nokkra daga þarna um daginn og kannski óvanalegt hvað þetta er búið að standa lengi.“

Þá sagði Karen nemendurna hafa tekið þessu rólega eins og flestir aðrir þó að sum hafi orðið svolítið hrædd, sérstaklega eftir stóra skjálftann.

En eiga þau von á stórum skjálfta?

 „Við höfum heyrt talað um að það geti verið von á því en ég held að við séum ekkert að stressa okkur á því. Ef það kemur stærri skjálfti þá verður hann bara að koma. Það er líka allt í lagi að fólk undirbúi sig aðeins fyrir það og kannski spái aðeins í það hvað þarf að gera og hvað þarf að gerast,“ sagði Jóhannes.