New York ríki kærir fyrirtæki Weinstein

Saksóknarar á vegum New York hafa lagt fram kæru á hendur framleiðslufyrirtæki Harvey Weinstein. Fyrirtækinu er gert að sök að hafa mistekist að vernda starfsmenn frá Harvey. BBC greinir frá. 

Weinstein hefur verið sakaður um kynferðisofbeldi og áreitni í garð fjölda kvenna síðustu misseri, þar á meðal þekktra leikkvenna. Eins hefur verið greint frá því hvernig hann reyndi að koma í veg fyrir að ásakanirnar yrðu gerðar opinberar í gegnum tíðina. Rúmlega fimmtíu konur hafa sakað hann um kynferðislegt ofbeldi eða áreitni.

Í málsókninni er gerð sú krafa að gróðinn sem hlýst af sölu fyrirtækisins renni að hluta til til fórnarlamba Weinstein en nokkrir fjárfestar hafa sýnt fyrirtækinu áhuga.

Saksóknarinn Eric Schneiderman sagði í dag að hann hafi lagt fram kæruna á hendur fyrirtækinu, Harvey Weinsten og Robert Weinsten. Eric sagði í yfirlýsingu að New York-búar ættu rétt á að vinna á vinnustöðum þar sem kynferðisleg áreitni og ótti líðist ekki.