Hreiðar Levý: Vorum ekki tilbúnir í neitt

„Þeir voru bara betri frá A til Ö, á öllum sviðum, við áttum ekki breik,“ sagði Hreiðar Levý Guðmundsson, markvörður Gróttu við Vísi, að loknu ellefu marka tapi gegn FH í kvöld.

Sigur FH leit aldrei út fyrir að vera í hættu og Hreiðar útilokar ekki úrslitin endurspegli einfaldlega getumuninn á milli liðanna.

„Ætli það ekki bara. Þetta er efsta liðið og við erum að berjast um fall. Það á að vera munur þarna á toppi og á botni. En ég vona að við eigum meira inni en þetta. Þessi spilamennska er ekki vænleg til árangurs.“

„Við vorum bara ekki tilbúnir í neitt. Alveg sama hvað það var.“

Næstu leikur Gróttu er gegn Stjörnunni. Sá leikur leggst ekkert gríðarlega vel í Hreiðar eftir spilamennsku síns liðs í kvöld.

„Ég veit það ekki, eftir þennan skell. Maður þarf náttúrlega bara að rífa sig upp. Við þurfum bara að gjöra svo vel og girða okkur í brók. Vera tilbúnari, klókari, tilbúnir í þá sem við ætlum að mæta og hvernig við ætlum að spila.“

„Við erum of seinir í allt, bæði í sókn og vörn. Við vitum ekkert hvað við erum að gera. Það er alveg sama hvert er litið, það þurfa allir að gera betur,“ sagði vonsvikinn Hreiðar Levý, að lokum.