Gamla konan fór að hágráta þegar símanúmer skólasystur hennar í Danmörku fannst

„Verðskráin er skýr og aðgengileg  og ekkert gjald er tekið meðan beðið er,“ segir Ágústa Finnbogadóttir hjá 1819.

Vísir greindi fá því fyrr í mánuðinum, og byggði þar meðal annars á úttekt Morgunblaðsins, að kostnaðurinn við að hringja í þjónustunúmerin 1818 og 1819 til að fá uppgefnar upplýsingar um símanúmer geta slagað vel uppí þúsund krónur. Þá fylgdi sögunni að fyrir komi að reikningar, einkum meðal þeirra sem eldri eru, geti slegið upp í 20 þúsund krónur fyrir þjónustuna.

Ágústa kannast ekki við slíka reikninga, hún segir fréttaflutninginn misvísandi og ekki gefa rétta mynd af því mikilvæga starfi sem unnið er á 1819. Ágústa segir það vissulega rétt að oft hringi eldra fólk og einmana en þá sé því vísað á Vinalínuna.

„Oft lendum við í því að það er hringt, manneskjan er þá mjög leið, jafnvel í sjálfsmorðshugleiðingum, þá þarf að bregðast mjög vel við og koma manneskjunni til þess að spjalla við hjálparlínuna eða 1717. Mjög mikilvægt er að bregðast rétt við og koma manneskjunni á réttan stað.“

Einn vill spyrja út leikara og gamlar kvikmyndir

Erindin sem 1819 fær eru reyndar af ýmsum toga og alls ekki dapurleg:

„Það er til dæmis aðili sem hringir oft í 1819 sem er með ýmsar spurningar um kvikmyndir.

Hann spyr um leikara í myndum, jafnvel ástir þeirra og örlög í raunverulegu lífi þeirra.

Hann spyr um leikstjóra og ártöl. Oft leiða spurningarnar frá einni kvikmynd yfir í aðra en mest eru þetta eldri kvikmyndir.“

Ágústa segir að þó starfsfólk 1819 reyni að sinna þeim sem hringja vel þá sé það ekki svo að reikningar fyrir slíka þjónustu hlaupi á tugum þúsunda.

„Eitt af því sem 1819 hefur lagt sig fram við er hröð þjónusta í svörun símtala og er staðan sú að meðaltals lengd símtals eru 30 sek og 95% símtala eru innan við mínútu.“

Þjónusta sem hefur vaxið mikið

1819 hóf starfsemi fyrir rétt rúmum þremur árum með það að markmiði, að sögn Ágústu, að bjóða á mun lægra verði þjónustu, sem þúsundir Íslendinga nota daglega. „Þessu hefur verið vel tekið enda er munurinn um 20 prósent ódýrari þjónusta.“

Hún bendir á að 1819 sé eina upplýsingaveitan sem er opin allan sólahringinn, allan ársins hring og veitir þannig aukið öryggi sem margoft hefur reynt á. „Á nóttunni vantar fólk oft upplýsingar um símanúmer til að hringja uppá flugstöð, töskur tapast og fleira. Það hefur kannski sofið yfir sig fyrir flug.“

Ágústa segir að nokkuð hafi dregið úr því að fólk notfæri sér þessa þjónustu eftir að frétt Vísis birtist og það sé miður.

„Auk þess að starfrækja þjónustuver sem svarar fyrir númerið 1819 þá er einnig haldin úti vefsíðan 1819.is þar sem hægt er að nálgast sömu upplýsingar og þjónustuverið gefur upp án kostnaðar, auk apps í farsíma sem einnig er gjaldfrjálst. Þessi þjónusta hefur vaxið gríðarlega og skipta notendur tugum þúsunda.“

Hjartnæm stund þegar gamla skólasystirin fannst

Vísi lék forvitni á að vita hvaða erindi þetta væru sem þau hjá 1819 fengju til viðfangs? Ágústa segir það allt milli himins og jarðar. Þannig hafi kona nokkur fengið leiðbeiningar um það hvernig hún ætti að elda sætar kartöflur.

„Mjög fullorðin kona sem leitaði að gamallar skólasystur sem hún hafði misst samband við fyrir 30 árum. Hún vissi að skólasystirin byggi í Danmörku.

Konan var orðin mjög veik og langaði svo að kveðja þessa gömlu vinkonu og þakka fyrir liðna tíð áður en hún færi.

Þegar okkar starfsmaður hafði fundið skólasysturina í Danmörku, bæði símanúmer og heimilisfang þá barst gamla konan í grát af gleði því hún hafði mjög litla trú á að hún myndi getað kvatt þessa skólasystur sína og trúði vart að nú myndi hún geta það og þakkaði aftur og aftur fyrir aðstoðina.“

Ágústa segir stundina hafa verið svo hjartnæma og fallega að starfsmaðurinn mátti hafa sig alla við að fara ekki að hágráta með konunni. „En, það láku nú samt tár í þjónustuverinu.“

Er dagur eða nótt?

Ágústa segir að oft sé verið að leita upplýsinga um annað en það sem kemur fram á 1819.is.

„Við þurfum þá að bregðast hratt við og færa okkur yfir á aðra miðla til að veita þessar upplýsingar. Dæmi um þetta er til dæmis þegar verið er að leita að ákveðnum vörum, uppskriftum, rafmagnsbilunum, færð á vegum, verkstæðum sem sinna viðgerðum á ákveðnum tegundum af bílum og margt fleira. Það skemmtilegasta við starfið er hversu þakklátt fólk er þegar við finnum þær upplýsingar sem leitað er eftir.“

Svo er að heyra á Ágústu að fá takmörk séu fyrir því hvaða erindi þetta eru sem þau hjá 1819 þurfa að sinna.

„Við fáum símtöl þar sem spurt hvort að það sé dagur eða nótt og líka hvaða dagur er í dag. Og við höfum lent í að taka þátt í partýum þar sem er spurningakeppni í gangi, mjög skemmtilegt,“ segir Ágústa. En hún telur það af og frá að fólk sitji uppi með tugþúsundakróna reikninga fyrir þjónustu 1819.

„1819 er þakklátt fyrir þann mikla meðbyr sem fyrirtækið hefur fengið þennan stutta starfstíma og greinilega hefur komið í ljós að þörf var á samkeppni á þessum markaði. Við munum áfram leggja okkur fram um góða þjónustu og sanngjarna verðlagningu.“