Ríkisstjórn Katrínar Jakobsdóttur tekin við

Ríkisstjórn Katrínar Jakobsdóttur, formanns Vinstri grænna og forsætisráðherra, tók við völdum á ríkisráðsfundi á Bessastöðum í dag. Ríkisstjórnina skipa sex karlar og fimm konur.

Fimm ráðherrar koma úr Sjálfstæðisflokknum, þrír ráðherrar koma úr röðum Vinstri grænna og þrír ráðherra eru úr Framsókn. Lyklaskipti í ráðuneytum verða á morgun, á fullveldisdaginn, 1. desember.

Fyrir Vinstri græn er Katrín forsætisráðherra, eins og áður segir, og Svandís Svavarsdóttir er heilbrigðisráðherra.

Guðmundur Ingi Guðbrandsson, framkvæmdastjóri Landverndar, er ráðherra umhverfis-og auðlindamála utan þings. Hann er félagi í Vinstri grænum og er sjöundi utanþingsráðherrann sem skipaður er á lýðveldistíma.

Að neðan má sjá frá komu nýju ráðherranna á Bessastaði.

Fyrir Framsóknarflokkinn tekur Sigurður Ingi Jóhannsson, formaður flokksins, við lyklunum að sveitarstjórnar- og samgönguráðuneytinu, Lilja Alfreðsdóttir er mennta-og menningarmálaráðherra og Ásmundur Einar Daðason er félagsmálaráðherra.

Þá eru ráðherrar Sjálfstæðisflokksins þau Bjarni Benediktsson sem fer í fjármála-og efnahagsráðuneytið, Guðlaugur Þór Þórðarson fer áfram með utanríkismálin, Kristján Þór Júlíusson er sjávarútvegs- og landbúnaðarráðherra, Sigríður Andersen er áfram í dómsmálaráðuneytinu og Þórdís Kolbrún Reykfjörð Gylfadóttir fer svo áfram með ferðamál, iðnað og nýsköpun.

Níu af ellefu ráðherrum hafa áður setið í ríkisstjórn en þeir Guðmundur Ingi og Ásmundur Einar hafa ekki áður gegnt ráðherraembætti.