Stjórnar Akademíunni um leið og hann spilar

Brandenborgarkonsert nr. 3 eftir Bach, Árstíðirnar fjórar í Buenos Aires eftir Piazzolla ásamt Fiðlukonserti í D-dúr op. 61 eftir Beethoven eru á dagskrá fiðlusnillingsins Joshua Bell og sveitarinnar Academy of St Martin in the Fields á tónleikum í Eldborg í kvöld sem hefjast klukkan 19.30. 

 Bell er ekki bara einn af frægustu fiðluleikurum heims, hann er tónlistarstjóri líka því hann stjórnar Akademíunni um leið og hann spilar, sem er mjög sérstakt,“ segir Melkorka Ólafsdóttir, verkefnastjóri í Hörpu, um listafólkið sem treður upp í Hörpu í kvöld.

 „Bell er eftirsóttur listamaður, enda hefur hann fengið marga fimm stjörnu dóma síðustu ár, ásamt sveitinni. Hópurinn var að spila í Elbphilharmonie, nýja, flotta tónlistarhúsinu í Hamborg, í fyrrakvöld og seldu í fullan sal. Verkið eftir Piazzolla er eiginlega tangótónlist, að sögn Melkorku sem telur tónleikana hafa mikla breidd og vera aðgengilega. „Þetta er mjög djúsí prógramm og Bell er alveg svakalega flottur,“ fullyrðir hún.

 

Mikill undirbúningur er að því að fá svona hljómsveit til landsins að sögn Melkorku. „En jafnframt er það mikill lúxus eftir að Eldborg kom,“ segir hún, „því Hapra fær mikla jákvæða athygli og háklassatónlistarfólk erlendis sýnir því áhuga að koma og spila hér. Þess vegna getum við valið úr,“ segir hún.

Ekki getur samt tónlistarfólkið sem um ræðir nú mikið séð af landinu í þetta sinn. Það kom í gærkveldi og fer strax á morgun. „Akademían er á stöðugu tónleikaferðalagi. Hún kemur fram á 80 tónleikum í 16 löndum á þessu starfsári og samhliða því stendur hún fyrir námskeiði fyrir skólabörn,“  segir Melkorka. „Hún heldur líka úti samstarfi við Southbank sinfóníuna, Guildhall School of Music and Drama og Royal Northern College of Music. Þetta er duglegt fólk.“