Leið yfir Aguero í hálfleik

Það var rokið með argentínska framherjann Sergio Aguero á sjúkrahús í hálfleik í leik Argentínu og Nígeríu í kvöld.

Það leið nefnilega yfir Aguero í leikhléinu og eðlilega leist mönnum ekki á blikuna. Hann kom aftur til meðvitundar er hann kom á spítalann. Ekki liggja fyrir frekari upplýsingar um líðan hans.

Nígería vann annars leikinn 4-2 en spilað var í Krasnodar í Rússlandi.

Ever Banega og Aguero komu Argentínu í 2-0 í leiknum en Nígería kom heldur betur til baka. Alex Iwobi skoraði tvö mörk fyrir Nígeríu og þeir Kelechi Iheanacho og Brian Idowu komust einnig á blað.