Sprenging í vændi: Samfélagsmiðlar í aðalhlutverki

Lögreglan telur að „sprenging“ hafi orðið í framboði vændis hér á landi á síðustu 18 mánuðum. Vændi virðist að stórum hluta hluta vera borið uppi af einstaklingum af erlendum uppruna sem koma hingað til lands sem ferðamenn.

Þetta kemur fram í nýrri skýrslu greiningadeildar Ríkislögreglustjóra um skipulagaða glæpastarfsemi. Þar segir að fyrirliggjandi upplýsingar bendi til þess að skipulagt vændi hafi aukist stórlega frá 2015. Telur lögregla að hluti þessarar starfsemi tengist erlendum skipulögðum glæpahópum.

Í skýrslunni segir að sala vændis fari að miklu leyti fram innan lokaðra hópa á samfélagsmiðlum og hafi slíkum auglýsingum fjölgað mjög síðastliðin tvö ár. Meginþorri þeirra kvenna sem þar auglýsa eða auglýstar er af erlendu bergi brotnar og eru stúlkur frá Ungverjalandi og Rúmeníu áberandi, að því er segir í skýrslunni.

Þrátt fyrir þetta aukna framboð hafa ekki mörg vændismál verið til rannsóknar hjá lögreglu sökum manneklu og nauðsyn þess að forgangsraða þeim málum sem lögregla rannsakar.

Lögregla telur líklegt að sumar þeirra erlendu kvenna sem stunda vændi séu sendar um lengri eða skemmri tíma til landsins og að búi nauðung, líkt og þekkist erlendis. Grunur leikur á að í einhverjum tilvikum fylgi erlendir karlmenn konunum og hafi hugsanlega með þeim eftirlit á meðan þær dveljast hér á landi.

Ber starfsemin merki mansals í mörgum tilvikum en vísbendingar eru um að einhverjar kvennanna njóti aðstoðar og milligöngu fólks sem búsett er hér á landi.

„Vændi virðist því að stærstum hluta borið uppi af einstaklingum af erlendum uppruna sem koma til landsins sem ferðamenn, oft í skamman tíma,“ segir í skýrslunni.