Ekki vitað hvað veldur magakveisu starfsmanna í grunnskólum

Sunna Kristín Hilmarsdóttir skrifar 24. ágúst 2017 16:13

Hörðuvallaskóli í Kópavogi er annar tveggja skóla þar sem starfsmann hafa margir hverjir fengið óþægindi í maga og niðurgang undanfarnar vikur. ALARK Arkitektar

Ekki liggur fyrir hver er sýkingarvaldur veikinda starfsmanna Háaleitisskóla í Reykjavík og Hörðuvallaskóla í Kópavogi en í báðum skólunum hefur á síðustu tveimur vikum komið upp faraldur magakveisu á meðal starfsmanna. Frá þessu er greint á vef Matvælastofnunar sem sendi frá sér tilkynningu vegna málsins ásamt sóttvarnalækni.

Vegna þessa þurfti að fresta skólasetningu í Háaleitisskóla. Hún átti að fara fram í dag en vegna þess að enn eru margir starfsmenn veikir var henni aftur frestað og á að vera á morgun.

Í frétt á vef skólans segir að jafnframt sé verið „að sótthreinsa í skólanum til öryggis til að fyrirbyggja hugsanlegt smit þar sem að enn hefur ekki verið staðfest hvað veldur þessum veikindum. Gripið er til þessara ráðstafana í samstarfi við Heilbrigðiseftirlit Reykjavíkur og sóttvarnalækni.“

Á vef MAST segir að ekki hafi borið á sambærilegum veikindum á meðal starfsmanna annnarra grunnskóla á höfuðborgarsvæðinu og þeir starfsmenn sem hafa veikst hafa ekki smitað aðra starfmsenn í neinum mæli.

„Rannsóknir á veikum einstaklingum hafa enn sem komið er ekki leitt í ljós sýkingarvald veikindanna og ekki er ljóst á þessari stundu hvernig einstaklingarnir smituðust en líklegt er að um matarsýkingu sé að ræða.

Á samráðsfundi sóttvarnalæknis með stjórnendum skólanna, Heilbrigðiseftirliti Reykjavíkur, Heilbrigðiseftirliti Hafnarfjarðar og Kópavogssvæðis, umdæmis- og svæðislæknum sóttvarna á höfuðborgarsvæðinu og Matvælastofnun var ákveðið að senda fleiri sýni í rannsóknir frá veikum einstaklingum og matvælum en þegar hefur verið gert. Veikum starfsmönnum verður ráðlagt að halda sig heima meðan niðurgangurinn gengur yfir og að auki í einn dag til viðbótar.

Hvatt er til almenns hreinlætis og handþvottar og að farið sé eftir leiðbeiningum um meðferð matvæla. Ekki er talin hætta á að magakveisan breiðist út til nemenda og því ekki ástæða til að stöðva starfsemi skólanna á grunni sýkingarhættu.

Áfram verður fylgst náið með framgangi veikinda í þessum tveimur skólum og hvort faraldrar komi upp í öðrum skólum,“ segir á vef MAST.