Allt um akstur Strætó og götulokanir á Menningarnótt

Frítt verður í alla strætisvagna á höfuðborgarsvæðinu á Menningarnótt, laugardaginn 19. ágúst. Strætó hvetur alla sem ætla sér að eyða deginum eða kvöldinu í miðbæ Reykjavíkur að nýta sér almenningssamgöngur. Símaver Reykjavíkurborgar verður vel mannað á laugardeginum og þá sem vantar frekari upplýsingar um hátíðina geta hringt í síma 411-1111.

Opið er í símaveri Reykjavíkurborgar frá klukkan 08:00-23:00.

Skutluþjónusta Strætó

Strætó verður með skutluþjónustu sem ekur frá Laugardalshöll, um Borgartún, að Hlemmi og þaðan beinustu leið upp að Hallgrímskirkju og til baka. Skutluþjónustan er góður valkostur fyrir þá sem ætla á bílnum í miðbæinn, en ökumenn eru hvattir til að leggja kringum Borgartún eða Laugardalshöll og nýta sér strætóskutluna í miðbæinn. Strætóskutlurnar munu keyra frá klukkan 07:30 til klukkan 01:00 um nóttina og frítt er fyrir alla farþega.

Leið Strætóskutlunnar má skoða hér.

Hefðbundið leiðakerfi Strætó rofið klukkan 22:30

Á Menningarnótt mun Strætó aka samkvæmt hefðbundinni laugardagsáætlun frá morgni til klukkan 22:30.

Klukkan 22:30 verður hefðbundið leiðakerfi Strætó rofið og sérstöku leiðakerfi verður komið á klukkan 23:00 sem miðar að því að koma gestum Menningarnætur heim eins fljótt og kostur er. Hver leið verður merkt bókstaf og munu þær keyra frá Hlemm eða BSÍ á mismunandi áfangastaði innan höfuðborgarsvæðisins. Rúmlega 70 strætisvagnar verða sendir eftir þörfum til þess að taka þátt í tæmingu miðbæjarins.

Hægt er að skoða sérstaka leiðakerfið á korti hér.

Leiðakerfi Strætó kl. 23:00 - 01:00 á Menningarnótt

Brottfarir frá Hlemmi og BSÍ.

Leið A: Bústaðavegur – Austurbær

Akstursleið: Teigar – Sund – Vogar – Gerði – Bústaðavegur – Háaleiti

Leið B: Breiðholt

Akstursleið: Sæbraut - Mjódd – Bakkar – Hólar – Berg – Fell – Seljahverfi

Leið G: Grafarvogur

Akstursleið: Ártún – Gullinbrú – Foldir – Hús – Rimar – Borgir – Víkur – Staðir

Leið H: Garðabær – Hafnarfjörður

Akstursleið: Hamraborg – Ásgarður – Reykjavíkurvegur – Fjörður – Hringbraut – Vellir

Leið K: Kópavogur

Akstursleið: Hamraborg – Digranes – Hjallar – Lindir – Salir – Kórar – Vatnsendi

Leið M: Grafarholt – Mosfellsbær*

Akstursleið: Vesturlandsvegur – Grafarholt – Úlfarsárdalur – Mosfellsbær

*(Ferð verður farin frá Háholti út á Kjalarnes kl. 00:30 )

Leið N: Árbær – Norðlingaholt

Akstursleið: Suðurlandsbraut - Ártún – Rofabær – Selásbraut – Norðlingaholt

Leið V: Vesturbær – Seltjarnarnes

Akstursleið: Þorragata – Hagar – Nesvegur – Seltjarnarnes – Grandar

GÖTULOKANIR

Á Menningarnótt er miðborgin ein allsherjar göngugata og verður því lokuð fyrir bílaumferð frá kl. 7 að morgni til 2 eftir miðnætti. Það er gert til þess að tryggja öryggi gangandi og akandi vegfaranda á þessum fjölsóttasta hátíðardegi ársins.

Gestir Menningarnætur eru hvattir til að ganga, hjóla eða nota almenningssamgöngur til að komast á hátíðarsvæðið. Þeir sem þurfa að koma á einkabíl er bent á að nota bílastæði við Borgartún og í Laugardalnum þar sem ókeypis strætóskutlur aka fólki til og frá hátíðarsvæðinu frá kl. 7.30-1.00.

Eins og lög gera ráð fyrir verður sektað fyrir ólöglegar bílastöður og þeir bílar sem hindra aðgengi lögreglu, sjúkrabíla og slökkviliðs verða dregnir í burtu svo unnt sé að tryggja aðgengi þessara öryggisaðila ef óhapp ber að.

Hægt er að nálgast kort yfir götulokanir á vefsíðu Menningarnætur eða fá upplýsingar í símaveri Reykjavíkurborgar frá kl. 8-23 á Menningarnótt, s.411-1111.