„Raunveruleikinn og glansmyndir haldast ekki alltaf í hendur“

„Berglaug Petra, vinkona mín og nemi í Ljósmyndaskóla Íslands, gaf nýlega út blað sem heitir ÓNEFNA. Hún og tvær aðrar stelpur voru að gera allskonar myndaþætti fyrir blaðið sem snérust um að leggja áherslu á jákvæða líkamsímynd,“ segir Indíana Nanna Jóhannsdóttir sem er 24 ára vefstjóri, bloggari og Tabata hóptímakennari.

Hún deildi á dögunum færslu á Instagram sem vakti mikla athygli. Þar sýnir hún hvernig líkaminn getur verið öðruvísi eftir líkamsstöðu og ekki sé alltaf allt sem sýnist. Indíana bloggar einnig um málið á vefsíðunni H Magasín.

 

 

Þessar myndir voru teknar til að sýna hversu ólíkur líkaminn getur verið í mismunandi pósum og stellingum. Það er gott að minna sig á að raunveruleikann er ekki alltaf að finna í glansmyndinni. . . Reynum að koma betur fram við okkur sjálf og reynum að elska líkamann okkar, sama hvernig hann er. Við fáum bara einn

A post shared by Indíana Nanna Jóhannsdóttir (@indianajohanns) on Jul 31, 2017 at 4:17pm PDT

„Ég hafði fengið þessa flugu í hausinn einhvern tímann um að það væri áhugavert að taka myndir af einstakling í mismunandi pósum og stellingum, önnur myndin væri þá uppstillt en hin afslöppuð og eðlileg. Við sjáum oftast bara uppstilltu myndirnar á netinu og það er gott að minna sig á að raunveruleikinn og glansmyndir haldast ekki alltaf í hendur.“

Indíana segir að viðbrögðin hafi verið mjög góð og er hún mjög þakklát fyrir það.

„Ég birti myndirnar fyrst á Instagram og hef verið að fá mikil viðbrögð þar og sérstaklega frá ungum stelpum og það þykir mér vænt um. Viðbrögðin við bloggfærslu minni voru einnig mjög jákvæð. Ef þessi myndaþáttur hefur haft jákvæð áhrif á eina stelpu eða einn strák þá er ég sátt.“ 

Indíana skrifar langa bloggfærslu um málið á H Magasín og segir þar að hún sé vissulega ekki fullkomin en; „Langar að vera besta Indíana Nanna Jóhannsdóttir sem til er í heiminum. Vellíðan og hamingja fyrir mér felst í því að líða vel í eigin skinni, vera í góðu andlegu jafnvægi og vera í góðum tengslum við fólkið sem ég elska. Þessir hlutir eru fyrir mér bæði andlegir og líkamlegir, oft stjórnanlegir en.. stundum nær innri gagnrýnandinn tökum.“

Hún segir að það sé ótrúlegt hvað við séum oft góð að rífa okkur sjálf niður.

„Svo hikum við oft ekki við að hrósa öðrum og hvetja þá áfram þegar þeim mistekst. Í glansmyndafári nútímans er auðvelt að gleyma sér, bera sig saman við aðra og rífa sig síðan niður fyrir að vera ekki að æfa jafn vel eða vera í jafn góðu formi og einhver annar sem dæmi.

Ég á ekki börn en ég vonast til að gerast svo lukkuleg að eignast börn í framtíðinni og fá að ala þau upp. Ég hugsa sérstaklega til þess að eignast stelpu og ef það gerist vil ég að hún líti á mig sem fyrirmynd. Ég vil vera hreinskilin við hana og kenna henni að vera sjálfstæð og sterk. Ég vil kenna henni að elska sig og líkamann sinn.“