Leiðréttu úrslit eftir á

Sú ótrúlega uppákoma átti sér stað í leik Danmerkur og Egyptalands á HM U-19 liða í Georgíu í dag að mark var skráð á rangt lið.

Þegar Hazem Mamdouh skoraði mark af vítalínunni fyrir Egyptaland seint í síðari hálfleik var annað mark samtímis skráð fyrir mistök á leikstjórnandann Mikkel Beck hjá Danmörku.

Það leiddi til þess að staðan í hálfleik var 16-12, en ekki 15-12 eins og átti að vera.

Draugamark Dana átti hins vegar eftir að skipta máli að lokum því þegar leiknum lauk höfðu Danir unnið eins marks sigur, 29-28 - þrátt fyrir að hafa skorað bara 28 mörk í leiknum.

Þetta uppgötvaðist eftir leik og raunar eftir að tveggja klukkutíma kærufrestur rann út hjá Alþjóðahandknattleikssambandinu, IFH.

En Danir tóku beiðni IHF um að leiðrétta úrslit leiksins vel og var það gert með samþykki beggja liða og sambandsins. Claus Hansen sagði það sjálfsagt mál en ítrekaði að Danir hefðu ekki haft rangt við.

„Við teljum að öll önnur lönd hefðu gert slíkt hið sama,“ sagði Hansen í viðtali á heimasíðu IHF.

Þar kemur einnig fram að allir starfsmenn á umræddum leik muni ekki koma frekar við sögu á öðrum leikjum á HM U-19 ára.