Ólafía lék lokahringinn frábærlega í dag

Ólafía Þórunn Kristinsdóttir, atvinnukylfingur úr GR, er í fullu fjöri á LPGA mótaröðinni.

Ólafía lék síðasta hringinn sinn í dag á Marathon Classic mótinu sem fram fer í Sylvania í Ohio-fylki í Bandaríkjunum. Þetta er 14. mótið sem Ólafía er að leika á tímabilinu á sterkustu mótaröð heims.

Ólafía fór fyrstu níu holurnar á 31 höggum sem er þremur höggum undir pari. Hún lék svo seinustu holurnar á 36 höggum og endaði lokahringinn á 67 höggum sem er fjórum höggum undir pari. Glæsilega gert hjá Ólafíu.

Hún var með sex fugla í dag, 10 pör og fékk tvo skolla. Þetta var lang besti hringur Ólafíu á þessu móti en hún lék hina þrjá hringina á 71, 70 og 72 höggum.

Ólafía situr eins og er í 42. sæti á mótinu en þó eiga kylfingar eftir að klára hringina sína og gæti því staða hennar breyst. Hægt er að fylgjast með stöðutöflu mótsins hér.